މާލޭ ބޮޑުތަކުރުފާނުމަގު އުސްފަސްގަނޑު ސަރަހައްދުގައި ރޭ ދަންވަރު ހިނގި ނުރައްކާތެރި އެކްސިޑެންޓެއްގައި އަނިޔާވި ކުޑަކުއްޖަކު ނިޔާވެއްޖެއެވެ.
ފުލުހުންގެ ޚިދުމަތުން މައުލޫމާތު ދިން ގޮތުގައި މި ހާދިސާގެ ރިޕޯޓް ލިބިފައިވަނީ ރޭ ދަންވަރު 1:39 ހާއިރުއެވެ. މި އެކްސިޑެންޓް ހިނގާފައިވަނީ ބޮޑުތަކުރުފާނުމަގު ބްރިޖް ލައިޓް ކައިރިން ބާރު ސްޕީޑްގައި ދުއްވި ސައިކަލެއް ކޮންޓްރޯލުން ނެއްޓި ޕޭމެންޓް މައްޗަށް އަރައިގެންނެވެ.
މި ހާދިސާ ހިނގިއިރު ސައިކަލު ދުއްވަން އިނީ 19 އަހަރުގެ ފިރިހެނެއް ކަމަށާއި، ސައިކަލުގެ ފަހަތުގައި އިނީ 16 އަހަރުގެ ފިރިހެން ކުއްޖެއް ކަމަށް ފުލުހުން ބުނެއެވެ. އެކްސިޑެންޓާ ގުޅިގެން މި ދެ މީހުންނަށްވެސް އެކިވަރުގެ އަނިޔާ ލިބިފައިވާތީ ވަގުތުން އައިޖީއެމްއެޗް ހޮސްޕިޓަލަށް ގެންގޮސް ފަރުވާ ދޭން ފަށާފައިވެއެވެ. ނަމަވެސް، ސައިކަލުގެ ފަހަތުގައި އިން 16 އަހަރުގެ ކުއްޖާއަށް ފަރުވާ ދެމުން ދަނިކޮށް ވަނީ ނިޔާވެފައެވެ.
ފުލުހުން އިތުރަށް ހާމަކުރި ގޮތުގައި، އެކްސިޑެންޓްވި ސައިކަލު ދުއްވަން އިން 19 އަހަރުގެ މީހާއަކީ އެ އުޅަނދު ދުއްވުމުގެ ގާނޫނީ ލައިސެންސް އޮންނަ މީހެއް ނޫނެވެ. މި ހާދިސާގައި ސައިކަލަށް ބޮޑެތި ގެއްލުންތަކެއް ލިބިފައިވާއިރު، ބާރު ސްޕީޑްގައި ދުއްވުމުގެ ސަބަބުން ސައިކަލު ކޮންޓްރޯލް ނުވެ ޕޭމެންޓަށް އެރި މައްސަލަ ފުލުހުން ދަނީ ސީރިއަސް މައްސަލައެއްގެ ގޮތުގައި ބަލަމުންނެވެ.
މި ހާދިސާއާ ގުޅިގެން ބަލަންޖެހޭ އިތުރު ކަންކަން ފުލުހުން މިހާރު ދަނީ ތަހުގީގު ކުރަމުންނެވެ.
