މިއަހަރުގެ ތެރޭގައި ރާއްޖޭގެ އިތުރު 10 ރަށެއްގައި އިސްލާމީ މަރުކަޒު އިމާރާތްކުރުމުގެ މަސައްކަތާއި، 17 ރަށެއްގައި މިސްކިތް ބިނާކުރުމުގެ މަސައްކަތް ފެށުމަށް ނިންމާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ ރައްޔިތުންގެ މަޖިލިސް މިއަހަރަށް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުންނެވެ.
އިސްލާމީ ބިނާތަކާއި މިސްކިތްތަކުގެ މަރާމާތު
ރައީސް ވިދާޅުވީ އިސްލާމީ މަރުކަޒުތަކުގެ ތެރެއިން 3 މަރުކަޒެއްގެ މަސައްކަތް ކުރިއަށްގެންދިޔުމަށް މިހާރު އެއްބަސްވުމުގައި ސޮއިކޮށްފައިވާ ކަމަށެވެ. އަދި ވޭތުވެދިޔަ އަހަރު 74 މިސްކިތާއި، 7 އިސްލާމީ މަރުކަޒާއި، 3 ޤުރުއާން މަރުކަޒު އަދި 6 ވަޤްފު ބިނާ ހިމެނޭހެން ޖުމްލަ 90 މަޝްރޫޢެއްގެ ޢަމަލީ މަސައްކަތް ކުރިއަށް ގެންގޮސްފައިވާކަން އެމަނިކުފާނު ފާހަގަކުރެއްވިއެވެ.
މިސްކިތްތައް މަރާމާތުކުރުމަށް ސަރުކާރުން ދޭ ސަމާލުކަމުގެ ދަށުން، ނިމިދިޔަ އަހަރު އެކަނިވެސް 19.4 މިލިއަން ރުފިޔާ ހޭދަކޮށްފައިވާނެ ކަމަށް ރައީސް ވިދާޅުވިއެވެ. މީގެ އިތުރުން ހުޅުމާލޭގައި ގްރޭންޑް މިސްކިތް އެޅުމުގެ ޢަމަލީ މަސައްކަތް މިއަހަރު ފެށޭނެ ކަމަށާއި، މާލޭގެ 4 މިސްކިތެއް ރަމަޟާން މަހުގެ ކުރިން އޭސީކޮށް ނިންމުމަށް މަސައްކަތް ކުރަމުންދާ ކަމަށްވެސް ވިދާޅުވިއެވެ.
ޙާފިޡުންނަށް ދޭ އެލަވަންސް ދެގުނަ ކުރުން
ކީރިތި ޤުރުއާން ހިތުދަސްކުރާ ޙާފިޡުންގެ އަގުވަޒަންކުރުމުގެ ގޮތުން، އެފަރާތްތަކަށް ސަރުކާރުން ދެމުން އައި އެލަވަންސް 2،000 ރުފިޔާއިން 4،000 ރުފިޔާއަށް ބޮޑުކޮށްފައިވާކަން ރައީސް އިޢުލާންކުރެއްވިއެވެ.
"ކީރިތި ޤުރުއާން ކިޔެވުމާއެކު އެ މަތިވެރި ކަލާމްފުޅު ހިތުދަސްކުރާ ޙާފިޡުންނަށް ދޭން ޖެހޭ ޤަދަރު އަޅުގަނޑުމެން ދޭން ޖެހޭނެ،" ރައީސް ވިދާޅުވިއެވެ.
ޤުރުއާނާ ބެހޭ މަރުކަޒުތަކާއި ވަޤްފު ބިނާ
ރާއްޖޭގެ މީހުން ދިރިއުޅޭ ކޮންމެ ރަށެއްގައި 2028 ވަނަ އަހަރުގެ ނިޔަލަށް ޤުރުއާނާ ބެހޭ މަރުކަޒުގެ ގޮތްޕެއް ހުޅުވުމަށް ސަރުކާރުން ވަނީ އަމާޒު ހިފާފައެވެ. އަދި ޤުރުއާނާ ބެހޭ ކަންކަމަށް ދެމެހެއްޓެނިވި ގޮތެއްގައި ފައިސާ ހޯދުމަށްޓަކައި މާލޭގައި ޚާއްސަ ވަޤްފު ޢިމާރާތެއް ބިނާކުރުމުގެ މަސައްކަތް މިއަހަރު ފެށޭނެކަމަށް ރައީސް ވިދާޅުވިއެވެ. ފާއިތުވި 2024 ވަނަ އަހަރަކީ ރާއްޖޭގެ ތާރީޚުގައި އެންމެ ގިނަ އަދަދަކަށް (30 ޙާފިޡުން) ދަސްވެނިވި އަހަރުކަންވެސް ރައީސް ފާހަގަކުރެއްވިއެވެ.
