ސަރުކާރުގެ ބޯހިޔާވަހިކަމުގެ މަޝްރޫއުތަކުގެ ދަށުން ގޯއްޗާއި ފްލެޓަށް ކުރިމަތިލުމުގެ ފުރުސަތު އަންނަ ޖެނުއަރީ މަހުގެ 15 ވަނަ ދުވަހު ހުޅުވާލާނެ ކަމަށް ހައުސިން މިނިސްޓްރީން ހޯމަ ދުވަހުގެ ރޭ އިއުލާނުކޮށްފިއެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ "ހުރިހާ ރައްޔިތުންނަށް ބޯހިޔާވަހިކަން" ސިޔާސަތުގެ ދަށުން ގޯއްޗާއި ފްލެޓް ދޫކުރުމާ ގުޅޭ ގަވާއިދުތައް މިހާރު ވަނީ ސަރުކާރުގެ ގެޒެޓްގައި ޝާއިއުކޮށްފައެވެ.
ހައުސިން މިނިސްޓްރީން ބުނި ގޮތުގައި، ބޯހިޔާވަހިކަމަށް އެދި ހުށަހެޅުމުގެ ފުރުސަތު ޖެނުއަރީ 15 އިން ފެށިގެން އޭޕްރީލް 14 ގެ ނިޔަލަށް ހުޅުވާލެވިފައި އޮންނާނެއެވެ. މި މަޝްރޫއުގެ ދަށުން ހުށަހަޅާ ހުރިހާ ފޯމެއްވެސް ހުށަހަޅަން ޖެހޭނީ "ހިޔާވެހި ޕޯޓަލް" މެދުވެރިކޮށެވެ.
މި ސްކީމްގެ ދަށުން ސަރުކާރުން ނިންމާފައިވަނީ 7,900 ފްލެޓާއި، 1,250 އޭކަރުގެ ސަރަހައްދަކުން 15,000 ގޯތި ދޫކުރުމަށެވެ. މާލޭގެ ރަށްވެހިންނަށް ދެ ކެޓަގަރީއަކުން ގޯތި ދޫކުރުމަށް ހަމަޖެހިފައިވާއިރު، ގްރޭޓަރ މާލެ ސަރަހައްދާއި ރަސްމާލެއިން ގޯތި ދޫކުރުމުގައި ހާއްސަ އިސްކަމެއް ދޭނެ ކެޓަގަރީތަކެއް ވަނީ ކަނޑައަޅާފައެވެ. މާލޭގައި ދިރިއުޅޭ އަތޮޅުތެރޭގެ ރަށްވެހިންނަށް ގޯތި ދޫކުރުމަށް ހަމަޖެހިފައިވަނީ ހަމައެކަނި ރަސްމާލެއިންނެވެ.
ރައީސް ޑރ. މުއިއްޒު ވައުދުވެވަޑައިގެންފައިވަނީ 18 އަހަރުން މަތީގެ ކޮންމެ ދިވެހި ރައްޔިތަކަށް ބޯހިޔާވަހިކަން ކަށަވަރުކޮށްދިނުމަށެވެ. މި ސިޔާސަތުގެ ދަށުން ކުރީގެ ސަރުކާރުގެ އުސޫލުތަކަށް ބައެއް ބަދަލުތައް ވަނީ ގެނެސްފައެވެ. އޭގެ ތެރޭގައި، ފްލެޓް ދޫކުރުމުގެ މިންގަނޑުތަކަށް ބަދަލު ގެނައުމާއި، ކުރިމަތިލާ ފަރާތްތަކަށް ލިބޭނެ ކޮޓަރީގެ އަދަދު ކަނޑައެޅުމުގެ އިހުތިޔާރު ހައުސިން މިނިސްޓްރީއަށް ލިބިގެންވެއެވެ.
ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުންވެސް ވަނީ ފުޅާ ދާއިރާއެއްގައި ގޯއްޗާއި ފްލެޓް ދޫކުރުމުގެ މަޝްރޫއުތަކެއް އިއުލާނުކޮށްފައެވެ. އެ ސަރުކާރުން ވެފައިވާ ބޯހިޔާވަހިކަމުގެ ވައުދުތައް ފުއްދުމުގެ މަސައްކަތްވެސް މިހާރު ކުރިއަށްދާ ކަމަށް މިނިސްޓްރީން ފާހަގަކުރެއެވެ.
