ގްރީންލޭންޑަށް އަސްކަރީ ގޮތުން އަރައިގަނެފާނެ ކަމުގެ ބިރު އޮތުމާއެކު، އެފަދަ ހާލަތަކަށް ތައްޔާރުވުމަށް އެ ގައުމުގެ ރައްޔިތުންނާއި ކަމާބެހޭ އިދާރާތަކަށް ބޮޑުވަޒީރު ޖެންސް-ފްރެޑްރިކް ނީލްސަން އިލްތިމާސްކުރައްވައިފިއެވެ. މިއީ ހިނގުމުގެ ފުރުސަތު ކުޑަ ކަމެއް ނަމަވެސް، މިފަދަ ހާލަތަކަށް ތައްޔާރުވެ ތިބުމަކީ މުހިންމު ކަމެއް ކަމަށް ބޮޑުވަޒީރު ވިދާޅުވިއެވެ.
ވެރިރަށް ނޫކްގައި ބޭއްވި ނޫސްވެރިންގެ ބައްދަލުވުމެއްގައި ބޮޑުވަޒީރު ނީލްސަން ވިދާޅުވީ، އަސްކަރީ ކުރިމަތިލުމެއް ހިނގުމަކީ ދުރު ކަމެއް ނަމަވެސް، އެކަން އެއްކޮށް ދޫކޮށްލެވެން ނެތް ކަމަށެވެ. މިކަމާ ގުޅިގެން ސަރުކާރުން ވަނީ ހާއްސަ ޓާސްކް ފޯހެއް އެކުލަވާލައި، އާންމު ދިރިއުޅުމަށް އަތުވެދާނެ ބުރޫއަކަށް ތައްޔާރުވުމަށް އާ އިރުޝާދުތަކެއް ނެރެފައެވެ. މީގެ ތެރޭގައި ކޮންމެ ގޭބިސީއެއްގައި މަދުވެގެން ފަސް ދުވަހުގެ ކާބޯތަކެތި ރައްކާކޮށްފައި ބެހެއްޓުމަށް ވަނީ އިލްތިމާސްކޮށްފައެވެ.
މި ނިންމުން އައިސްފައިވަނީ އެމެރިކާގެ ރައީސް ޑޮނަލްޑް ޓްރަމްޕް، ސަލާމަތީ ސަބަބުތަކަށްޓަކައި ގްރީންލޭންޑް މިލްކުކުރަން ބޭނުންވާ ކަމަށް ވިދާޅުވެ އިންޒާރުތައް ދެއްވަމުން ގެންދަވާ ދަނޑިވަޅެއްގައެވެ. ޓްރަމްޕް ވަނީ ގްރީންލޭންޑްގައި އެމެރިކާގެ ދިދަ ޖަހާފައިވާ އޭއައި ފޮޓޯއެއްވެސް ސޯޝަލް މީޑިއާގައި ހިއްސާކުރައްވާފައެވެ. ގްރީންލޭންޑަކީ ޑެންމާކްގެ ބައެއް ނަމަވެސް، ދިފާއީ އަދި ހާރިޖީ ސިޔާސަތު ފިޔަވައި އެހެން ހުރިހާ ކަމެއް ބަލަހައްޓަނީ އެ ގައުމުގެ އަމިއްލަ ސަރުކާރުންނެވެ.
ގްރީންލޭންޑްގެ ފިނޭންސް މިނިސްޓަރު މުޓޭ ބީ. އެގެޑޭ ވިދާޅުވީ، ގައުމަށް ބޮޑު ޕްރެޝަރެއް އެބައޮތް ކަމަށާއި ހުރިހާ ހާލަތަކަށްވެސް ތައްޔާރުވާން ޖެހޭ ކަމަށެވެ. މި ނުތަނަވަސްކަމާ ގުޅިގެން ޑެންމާކުން ވަނީ ގްރީންލޭންޑްގެ ދިފާއު ވަރުގަދަކުރުމަށް އިތުރު ސިފައިން ފޮނުވާފައެވެ. އަދި ނޭޓޯގެ ހަތް ގައުމަކާ ގުޅިގެން "އޮޕަރޭޝަން އާކްޓިކް އެންޑިއުރެންސް" ގެ ދަށުން އަސްކަރީ ތަމްރީނުތައް މުޅި އަހަރަށް ބަހާލައިގެން ކުރިއަށް ގެންދިއުމަށް ވަނީ ނިންމާފައެވެ.
މީގެ އިތުރުން، ކެނެޑާގެ އަސްކަރިއްޔާއިންވެސް ވަނީ އެމެރިކާއިން އެ ގައުމަށް އަރައިގަނެފާނެ ހާލަތެއްގައި އަމަލުކުރާނެ ގޮތުގެ މޮޑެލްތަކެއް ތައްޔާރުކޮށްފައެވެ. މިއީ ޓްރަމްޕް ކެނެޑާއަކީ އެމެރިކާގެ 51 ވަނަ ސްޓޭޓަށް ވެދާނެ ކަމަށް ވިދާޅުވުމާ ގުޅިގެން އެޅި ފިޔަވަޅެކެވެ. މި ހުރިހާ ކަމަކަށް ބަލާއިރު، އާކްޓިކް ސަރަހައްދުގެ ސަލާމަތީ މަސްރަހު މިހާރު ވަނީ ވަރަށް ބޮޑަށް ހޫނުވެފައެވެ.
