ރާއްޖެއާއި އިންޑިއާއިން އިޔާދަކުރަނިވި ހަކަތަ (ރިނިއުބަލް އެނަރޖީ) ގެ ދާއިރާގައި ގުޅިގެން މަސައްކަތްކުރުމަށް މަޝްވަރާކޮށް، ދެގައުމުގެ ގުޅުން އިތުރަށް ހަރުދަނާކޮށްފިއެވެ. މި މަޝްވަރާތައް ކުރިއަށް ގެންގޮސްފައިވަނީ އިންޓަނޭޝަނަލް ސޯލާ އެލަޔަންސް (އައިއެސްއޭ) އެސެމްބްލީގެ ތެރެއިން، އިންޑިއާގެ ވެރިރަށް ދިއްލީގައެވެ.
މި ބައްދަލުވުމުގައި ރާއްޖޭގެ ފަތުރުވެރިކަމާ ތިމާވެއްޓާބެހޭ ވުޒާރާގެ ޑެޕިއުޓީ މިނިސްޓަރު ހުސައިން އަގީލް ނަސީރު، އިންޑިއާގެ އިޔާދަކުރަނިވި ހަކަތައާއި ކާނާ އަދި އާންމު ބެހެނިވެރިކަމާ ބެހޭ މިނިސްޓަރު ޝްރީ ޕްރަލްހާދު ވީ. ޖޯޝީއާ ބައްދަލުކުރެއްވިއެވެ. އެ ބައްދަލުކުރެއްވުމުގެ މައިގަނޑު މަޤްސަދަކީ ދެގައުމު ގުޅިގެން އިޔާދަކުރަނިވި ހަކަތަ ކުރިއެރުވުމަށް މަސައްކަތް ކުރެވޭނެ ގޮތްތަކާމެދު މަޝްވަރާކުރުމެވެ.
ތިމާވެށްޓާ ބެހޭ ވުޒާރާއިން ހާމަކުރެއްވި ގޮތުގައި، ދެ ބޭފުޅުން ވަނީ އިޔާދަކުރަނިވި ހަކަތައިގެ ބޭނުން އިތުރުކޮށް، މި ދާއިރާގައި އައު މަޝްރޫއުތައް ފެށުމަށްޓަކައި އެކި ގޮތްގޮތުން ގުޅިގެން މަސައްކަތް ކުރެވިދާނެ ގޮތްތަކާ ބެހޭގޮތުން ތަފްސީލީ މަޝްވަރާތައް ކުރައްވާފައެވެ. ޑެޕިއުޓީ މިނިސްޓަރު ހުސައިން އަގީލް ވަނީ ރާއްޖެ ފަދަ ކުދި ރަށްތަކުގެ މައްޗަށް އެކުލެވޭ ގައުމަކަށް، ސޯލާ ހަކަތަ ފަދަ އިޔާދަކުރަނިވި ހަކަތައަކީ ހަކަތައިގެ ބޭނުންތަކަށްޓަކައި ވަރަށް މުހިންމު ދައުރެއް އަދާކުރާނެ ކަމެއްކަން ފާހަގަކުރައްވާފައެވެ.
މި ބައްދަލުވުމުގައި އިންޑިއާގެ މިނިސްޓަރު ޝްރީ ޕްރަލްހާދު ވީ. ޖޯޝީ ވަނީ، އިޔާދަކުރަނިވި ހަކަތައިގެ ދާއިރާގައި ރާއްޖެއާ ގުޅިގެން މަސައްކަތް ކުރުމަށް އިންޑިއާ ތައްޔާރަށް އޮތްކަން ހާމަކުރައްވާފައެވެ. ދެ ބޭފުޅުންވެސް ފާހަގަކުރެއްވި ގޮތުގައި، މިފަދަ މަޝްރޫޢުތައް ހިންގުމަކީ ތިމާވެއްޓަށް ރައްކާތެރިވެ، ދެގައުމުގެ ހަކަތައިގެ ބޭނުންތަކަށް ދެމެހެއްޓެނިވި ހައްލުތަކެއް ހޯދުމަށް މުހިންމު ކަމެކެވެ. އައިއެސްއޭ އެސެމްބްލީގެ މި ބައްދަލުވުމުގެ ސަބަބުން ދެގައުމުގެ ގުޅުން އިތުރަށް ހަރުދަނާވެ، ހަކަތައިގެ ދާއިރާގައި އިތުރު ފުރުސަތުތަކެއް ހުޅުވޭނެކަމަށް ލަފާކުރެވެއެވެ.
