ބިންވެރިޔާ ސްކީމްގެ ކޮރަޕްޝަން މައްސަލައިގައި ކުރެވެމުންދާ ތަޙުޤީޤާ ގުޅިގެން 20 މީހެއްގެ ޕާސްޕޯޓު ހިފަހައްޓައިފިކަމަށް ފުލުހުން މިއަދު ހާމަކޮށްފިއެވެ.
މި މައްސަލައިގައި ޕާސްޕޯޓު ހިފެހެއްޓުނު މީހުންގެ ތެރޭގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރު ފަޒުލް ރަޝީދާއި އޭނާގެ ބޭބެ މުޙައްމަދު ފަޒީލް ރަޝީދު ހިމެނޭކަމަށްވެސް ފުލުހުން ބުނެފައިވެއެވެ.
މި މައްސަލައަކީ ބިންވެރިޔާ ސްކީމްގައި ނުހިމެނޭ ބަޔަކަށް ގޯތިތަކެއް ދީފައިވާކަމަށް ތުހުމަތުކުރެވޭ މައްސަލައެކެވެ. މިކަމާ ގުޅިގެން ފުލުހުންނާއި އެންޓި-ކޮރަޕްޝަން ކޮމިޝަން (އޭސީސީ)އިން ވަނީ ތަޙުޤީޤު ފަށާފައެވެ.
މި މައްސަލައިގައި އެޗްޑީސީގެ ބޯޑުގެ ގިނަ މެންބަރުން ވަނީ ސަސްޕެންޑް ކުރެވިފައެވެ. ނަމަވެސް، ފަޒުލް ރަޝީދު ވަނީ މި މައްސަލައިގައި އޭނާގެ އެއްވެސް ދައުރެއް ނޯންނާނެކަމަށް ބުނެފައެވެ.
