އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު މަޤާމުން ސަސްޕެންޑް ކޮށްފިއެވެ. މި ފިޔަވަޅު އަޅާފައިވަނީ ކުރީގެ ސަރުކާރުގެ "ބިންވެރިޔާ" ސްކީމްގެ ދަށުން ގޯތި ލިބުމުގެ ޝަރުތު ހަމަނުވާ ފަރާތްތަކަށް ގޯތި ދޫކޮށްފައިވާ ކަމަށް ތުހުމަތު ކުރެވޭ މައްސަލައަކާ ގުޅިގެންނެވެ.
ފަޒީލްއަކީ ހައުސިން ޑެވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެއެވެ. މި މައްސަލައާ ގުޅިގެން ޕީސީބީން ވަނީ ފަޒުލްއާއި އެޗްޑީސީގެ އެންމެ ބޯޑު މެންބަރަކު ފިޔަވައި ހުރިހާ ޑިރެކްޓަރުން ސަސްޕެންޑްކޮށްފައެވެ.
އެމްޑަބްލިޔުއެސްސީން މަޢުލޫމާތު ދީފައިވާ ގޮތުގައި ފަޒީލް ސަސްޕެންޑް ކުރެވިފައިވަނީ އެޗްޑީސީއާ ގުޅޭ ގޮތުން ފުލުހުން ކުރިއަށްގެންދާ ތަޙްޤީޤަށް އެހީތެރިވުމުގެ ގޮތުންނެވެ. ފުލުހުން ބުނެފައިވަނީ މި މައްސަލައިގައި ޖިނާއީ ތަޙްޤީޤެއް ކުރިއަށްދާ ކަމަށެވެ.
މި މައްސަލައާ ގުޅޭ ގޮތުން ބޭއްވުނު ނޫސްވެރިންގެ ބައްދަލުވުމެއްގައި އިބްރާހީމް ފަޒުލް ރަޝީދު ވިދާޅުވެފައިވަނީ އެކަމުގައި އޭނާގެ މަޞްލަޙަތެއް ނެތް ކަމަށާއި، މިފަދަ މައްސަލައެއް އޭނާގެ ބޭބެއާ ގުޅިގެން ފެންމަތިވުމަކީ އިއްތިފާޤެއް ކަމަށެވެ. އަދި ގޯތި ދޫކުރުމާއި ރަޖިސްޓްރީ ހެދުމަކީ އެޗްޑީސީން ކުރާ ކަމެއް ނޫން ކަމަށްވެސް އޭނާ ވިދާޅުވިއެވެ.
