އިސްރާއީލުން ޣައްޒާއަށް ދެމުންގެންދާ ހަނގުރާމަ ނިންމުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހަޅުއްވާފައިވާ ހުށަހެޅުމާ މެދު މަޝްވަރާކުރުމަށް، މިއަންނަ ހޯމަ ދުވަހު ޝަރަމް އައް-ޝެއިޚްގައި ބައިނަލްއަޤްވާމީ ބައްދަލުވުމެއް ބޭއްވުމަށް ހަމަޖެހިއްޖެއެވެ. މި ބައްދަލުވުން އިސްވެ ހިންގަވާނީ އެމެރިކާގެ ރައީސް ޓްރަމްޕް އާއި މިސްރުގެ ރައީސް އަބްދުލް ފައްތާހް އައް-ސީސީއެވެ.
މިސްރުގެ ރިޔާސީ ގަނޑުވަރުން ހޮނިހިރު ދުވަހު ނެރުނު ބަޔާނެއްގައި ބުނެފައިވާ ގޮތުގައި، މި ބައްދަލުވުމުގައި 20 އަށްވުރެ ގިނަ ޤައުމުތަކުގެ ލީޑަރުން ބައިވެރިވެ ވަޑައިގަންނަވާނެއެވެ. އަދި މި ބައްދަލުވުމުގެ މަޤްޞަދަކީ "ޣައްޒާގެ ހަނގުރާމަ ނިންމައި، މެދުއިރުމަތީގައި ސުލްހަ އާއި ހަމަޖެހުން ޤާއިމްކުރުމަށް ކުރެވޭ މަސައްކަތްތައް ހަރުދަނާކޮށް، ސަރަޙައްދީ ސަލާމަތާއި ހަމަޖެހުމުގެ އައު ދައުރެއް ފެށުން" ކަމުގައި ބަޔާނުގައި ބުނެފައިވެއެވެ.
މި ބައްދަލުވުމުގައި އދ.ގެ ސެކްރެޓަރީ ޖެނެރަލް އަންޓޯނިއޯ ގުޓެރެސް އާއި، ބްރިޓަނުގެ ބޮޑުވަޒީރު ކީރް ސްޓާމަރ، އިޓަލީގެ ޖިއޯޖިއާ މެލޯނީ އަދި ސްޕެއިންގެ ޕެޑްރޯ ސަންޗެޒް ބައިވެރިވެ ވަޑައިގަންނަވާނެ ކަމަށް ވަނީ އިއުލާނު ކުރައްވާފައެވެ. އަދި ފަރަންސޭސި ރައީސް އެމެނުއެލް މެކްރޯން ވެސް ބައިވެރިވެ ވަޑައިގަންނަވާނެ ކަމަށް ވަނީ ކަށަވަރުކުރައްވާފައެވެ.
އެހެންނަމަވެސް، އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ނުވަތަ ހަމާސްގެ އެއްވެސް މަންދޫބެއް މި ބައްދަލުވުމުގައި ބައިވެރިވެ ވަޑައިގަންނަވާނެތޯ އަދި ވަނީ ސާފުނުވެއެވެ. މި ބައްދަލުވުން އިއުލާނުކުރެވުނީ، އެމެރިކާގެ މެދުވެރިކަމާއެކު ވެވުނު އެއްބަސްވުމެއްގެ ދަށުން އިސްރާއީލީ ސިފައިން އަނބުރާ ގެންދިއުމާއެކު، ދެފަރާތުގެ ހަނގުރާމަ ހުއްޓުމަކަށް އައިސް، ޣައްޒާގެ އުތުރަށް ދިހަ ހާހަށްވުރެ ގިނަ ފަލަސްތީނު ރައްޔިތުން އެނބުރި ދަނިކޮށެވެ.
ޣައްޒާގައި މިހާތަނަށް 67،000 އަށްވުރެ ގިނަ މީހުން މަރުވެފައިވާއިރު، ބަނޑުހައިހޫނުކަމުގެ ހާލަތެއް ކުރިމަތިވެފައިވާ މި ސަރަޙައްދުގެ ބޮޑު ބައެއް ވަނީ ވީރާނާވެފައެވެ. ހަނގުރާމަ ހުއްޓުމަށްފަހު، ފަލަސްތީނު ރައްޔިތުންގެ ދިރިއުޅުން ރަނގަޅުކުރުމަށް 5،000 އާންމު އޮޕަރޭޝަންތައް ހިންގިފައިވާ ކަމަށް ޣައްޒާގެ ގަވަރމަންޓް މީޑިއާ އޮފީހުން ބުނެފައިވެއެވެ.
