ދުނިޔޭގެ ތިމާވެށީގެ ދުވަހާއި ކަނޑުތަކުގެ ދުވަސް ފާހަގަކުރުމުގެ ގޮތުން، ރާއްޖޭގެ އެންމެ ދުވަސްވީ ތިމާވެށި ޖަމިއްޔާ، ބްލޫޕީސް އިން އިސްނަގައިގެން ރ. ހުޅުދުއްފާރުގައި ގަސް އިންދުމުގެ ބޮޑު ހަރަކާތެއް ކުރިއަށް ގެންގޮސްފިއެވެ. މި ހަރަކާތަކީ އެ ޖަމިއްޔާގެ ކޯ-ފައުންޑަރ، މަރުހޫމް އަބްދުލް ބާރީ ރުޝްދީގެ ހަނދާނުގައި ބޭއްވި ހަރަކާތެކެވެ.
ހުޅުދުއްފާރު ކައުންސިލާ ގުޅިގެން ކުރިއަށް ގެންދިޔަ މި ހަރަކާތުގައި އެ ރަށުގެ ބޮޑުމަގުގެ ދެފަރާތުގައި 100 އިންދި އަނބުގަސް ވަނީ އިންދާފައެވެ. މީގެ އިތުރުން، ރަށުގެ މައި ހަތަރު އަނގޮޅި ކައިރީގައި ގަސް އިންދުމަށް ހާއްސަކުރެވިފައިވާ ސަރަހައްދުތަކުގައި 12 ސައްކެޔޮ ގަސް ވެސް ވަނީ އިންދާފައެވެ.
In memory of #Bluepeace' co-founder Late Abdul Bari Rusdhi and to celebrate #WorldEnvironmentDay and #WorldOceanDay by Bluepeace in association with #HulhdhuffaruCouncil planted 100 grafted mango trees along the roadside of #Hulhdhuffaru Bodu Magu and 12 grafted jackfruit fruit… pic.twitter.com/08cWBGZier
— Bluepeace (@bluepeacemv) June 13, 2026
ބްލޫޕީސް އަކީ 11 ސެޕްޓެމްބަރު 1989 ގައި ރާއްޖޭގައި އުފެދުނު އެންމެ ފުރަތަމަ އަދި އެންމެ ދުވަސްވީ ތިމާވެށި ހިމާޔަތްކުރުމަށް މަސައްކަތްކުރާ ޖަމިއްޔާއެވެ. މި ޖަމިއްޔާއަކީ ސަރުކާރާ ވަކިން، އަމިއްލަ ފަރުދުންގެ ހިލޭސާބަހަށް މަސައްކަތްކުރާ ޖަމިއްޔާއެއްގެ ގޮތުގައި ފާހަގަކޮށްލެވެއެވެ.
މި ޖަމިއްޔާގެ މައިގަނޑު މަސައްކަތްތަކުގެ ތެރޭގައި ތިމާވެއްޓަށް ހޭލުންތެރިކުރުވުމާއި، ނުރައްކަލަށް ހުށަހެޅިފައިވާ ދިރޭތަކެތި ކަމަށްވާ ކަހަނބާއި ތަފާތު ދޫނިސޫފާސޫފި ހިމާޔަތްކުރުމަށް ވަކާލާތުކުރުން ހިމެނެއެވެ. އަދި ރާއްޖޭގެ ފަރުތަކާއި، ކުޅި އަދި ފާ ފަދަ ޗަސްބިންތައް ސަލާމަތްކުރުމަށް ގިނަގުނަ ކެމްޕެއިންތަކެއް އެ ޖަމިއްޔާއިން އަންނަނީ ހިންގަމުންނެވެ.
މި ހަރަކާތަކީ ތިމާވެށި ރައްކާތެރިކުރުމުގެ މުހިންމުކަން އަންގައިދިނުމަށާއި، ރަށު ތެރެ ފެހިކުރުމަށް ބްލޫޕީސް އާއި ހުޅުދުއްފާރު ކައުންސިލުން ގުޅިގެން ކުރިއަށް ގެންދިޔަ ނަމޫނާ މަސައްކަތެކެވެ.
