މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން އަލަށް ގެޒެޓުކޮށް އަމަލުކުރަން ފަށާފައިވާ ކާބޯތަކެތި ލޭބަލްކުރުމުގެ ގަވާއިދަށް ފުރިހަމައަށް އަމަލުކުރުމަށް ވިޔަފާރިވެރިންނަށް ހަ މަސްދުވަހުގެ މުހުލަތެއް ދީފިއެވެ. މި މުއްދަތަކީ ބާޒާރުގައި މިހާރު ހުރި ޕެކެޓުކޮށްފައިވާ އުފެއްދުންތައް އާ މިންގަނޑުތަކަށް ފެއްތުމަށް ދީފައިވާ މުއްދަތެކެވެ.
އެމް.އެފް.ޑީ.އޭ އިން ހާމަކޮށްފައިވާ ގޮތުގައި، މި އާ ގަވާއިދުގެ މަގުސަދަކީ ކާބޯތަކެތީގެ ރައްކާތެރިކަން ކަށަވަރުކުރުމާއި، ކާބޯތަކެތީގެ މައުލޫމާތު ސައްހަގޮތުގައި ކަސްޓަމަރުންނަށް ފޯރުކޮށްދިނުމެވެ. އެހެންކަމުން، ބާޒާރުގައި ވިއްކަން ހުންނަ ހުރިހާ ޕެކެޓުކުރި ކާބޯތަކެއްޗެއްގައި މި ގަވާއިދުގެ ދަށުން ކަނޑައަޅާފައިވާ މިންގަނޑުތަކަށް ލޭބަލް ހުންނަންޖެހޭނެއެވެ.
މި ގަވާއިދާ ޚިލާފުވާ ފަރާތްތަކާމެދު ހަރުކަށި ފިޔަވަޅުތަކެއް އެޅުމަށް ވަނީ ކަނޑައަޅާފައެވެ. އެގޮތުން، ގަވާއިދާ ޚިލާފަށް ނުވަތަ އޮޅޭގޮތަށް ލޭބަލްކޮށްގެން މުދާ ވިއްކާނަމަ ބޮޑެތި އަދަދުތަކުން ޖޫރިމަނާކުރުމުގެ އިޚްތިޔާރު އޮތޯރިޓީއަށް ލިބިގެންވެއެވެ.
މީގެ އިތުރުން، ކުށް ތަކުރާރުކުރާ ފަރާތްތަކާމެދު އިތުރު ފިޔަވަޅުތައް އެޅުމަށްވެސް ވަނީ ނިންމާފައެވެ. އެގޮތުން ގަވާއިދާ ތަކުރާރުކޮށް ޚިލާފުވާނަމަ ވިޔަފާރީގެ ހުއްދަތައް ބާތިލުކުރުމުގެ ބާރު ވެސް އެމް.އެފް.ޑީ.އޭ އަށް މި ގަވާއިދުގެ ދަށުން ލިބިގެންދާނެއެވެ.
އެމް.އެފް.ޑީ.އޭ އިން ވަނީ ދީފައިވާ ހަ މަސްދުވަހުގެ މުހުލަތުގެ ތެރޭގައި ހުރިހާ ވިޔަފާރިވެރިންވެސް އާ ގަވާއިދަށް އަހުލުވެރިވެ، އުފެއްދުންތަކުގެ ލޭބަލްތައް އިސްލާހުކުރުމަށް އިލްތިމާސްކޮށްފައެވެ.
