ރާއްޖޭގައި ފެތުރެމުންދާ ހިމަބިހި ކޮންޓްރޯލް ކުރުމަށް އެހީތެރިވުމުގެ ގޮތުން، އިންޑިއާ ސަރުކާރުން 20،000 ޑޯޒްގެ ވެކްސިނާއި ތިން ޓަނުގެ ބޭހާއި މެޑިކަލް ސަޕްލައިގެ ދެވަނަ ޝިޕްމަންޓް ރޭގެ ވަގުތެއްގައި ވަނީ މާލެ ގެނެސްފިއެވެ.
މި އެހީގެ ދަށުން ގެނައި ތަކެތީގެ ތެރޭގައި 20،000 ޑޯޒްގެ އެމްއާރު ވެކްސިންގެ އިތުރުން، އެކި ބާވަތްތަކުގެ ބޭހާއި، ސިރިންޖާއި، ބަލި ދެނެގަންނަ ކިޓުތަކުގެ އިތުރުން ސިއްހީ ފަރުވާގައި ބޭނުންކުރާ މުހިންމު ސާމާނުތައް ހިމެނެއެވެ. މި ތަކެތީގެ ސަބަބުން ރާއްޖޭގައި ބަލި ފެތުރުން ހުއްޓުވުމަށް ސިއްހީ އިދާރާތަކުން ކުރަމުންދާ މަސައްކަތްތަކަށް އިތުރު ބާރަކަށް ވެގެންދާނެ ކަމަށް ހައިކޮމިޝަނުން ބުނެފައިވެއެވެ.
The second tranche of Measles-Rubella vaccines & 3 tonnes of medical supplies from India reached Malé today, reflecting the strong & enduring partnership b/w India & the Maldives and our shared commitment to public health.#FirstResponder#VaccineMaitri#NeighborhoodFirst https://t.co/eKituZkhWn pic.twitter.com/P7rB9AgKjY
— India in Maldives (@HCIMaldives) June 12, 2026
އިންޑިއާގެ އެކްސްޓާނަލް އެފެއާޒް މިނިސްޓްރީގެ ތަރުޖަމާނު ރަންދީރު ޖެއިސަލްވާލް ވިދާޅުވީ، މިއީ އިންޑިއާގެ 'ނެއިބަހުޑް ފަސްޓް' ސިޔާސަތުގެ ދަށުން، ކަމެއް ދިމާވާ ހިނދު އެންމެ ފުރަތަމަ އެހީތެރިކަން ފޯރުކޮށްދޭ ގައުމުގެ ހައިސިއްޔަތުން ރާއްޖެއަށް ފޯރުކޮށްދިން އެހީއެއް ކަމަށެވެ. އަދި މި އެހީއަކީ ރާއްޖޭގައި ދާދިފަހުން ފެނުނު ހިމަބިހީގެ ކޭސްތަކާ ގުޅިގެން، އެ ބަލި ފެތުރުން ހުއްޓުވުމަށް ދިން އެހީއެއްކަން އޭނާ ފާހަގަކުރެއްވިއެވެ.
މި އެހީއަކީ އިންޑިއާ އާއި ރާއްޖެއާ ދެމެދު އޮތް ވަރުގަދަ އަދި ދެމެހެއްޓެނިވި ގުޅުން ރަމްޒުކޮށްދޭ ކަމެއް ކަމަށާއި، މިއީ އާންމު ސިއްހަތު ރައްކާތެރިކުރުމަށް ދެ ގައުމުން ކުރާ މަސައްކަތް ހާމަކޮށްދޭ ކަމެއް ކަމަށް ހައިކޮމިޝަނުން ވަނީ ބުނެފައެވެ.
