މަސްތުވާތަކެތީގެ މައްސަލަތައް ތަހުޤީގުކުރުމުގެ ނިޒާމު ހަރުދަނާކުރުމުގެ ގޮތުން، "މަސްތުވާތަކެތީގެ މައްސަލަތަކުގައި ކޮންޓްރޯލްޑް ޑެލިވަރީ ހިންގުމާއި، ކުޑަކަމުދާ އެއްޗެހި ދިނުމަށް އެންގުމާއި، އެ އެއްޗެހި ތަޙުލީލުކުރުމަށް ފޮނުވުމުގައި ޢަމަލުކުރާނެ ގޮތުގެ ޤަވައިދު" އެކުލަވާލައި ސަރުކާރުގެ ގެޒެޓްގައި ޝާއިއުކޮށްފިއެވެ. މަސްތުވާތަކެއްޗާބެހޭ ޤާނޫނުގެ ދަށުން ބާރުލިބިގެން އެކުލަވާލި މި ޤަވައިދުގެ ސަބަބުން، މަސްތުވާތަކެތީގެ އޮޕަރޭޝަންތައް ހިންގުމާއި ތަހުލީލުތައް ކުރުމުގައި އަމަލުކުރާނެ ސާފު އިޖުރާއަތްތަކެއް ވަނީ ކަނޑައެޅިފައެވެ.
މި ޤަވައިދުގައިވާ ގޮތުން، ކޮންޓްރޯލްޑް ޑެލިވަރީގެ އޮޕަރޭޝަންތައް ކުރިއަށް ގެންދެވޭނީ ކޮމިޝަނަރ އޮފް ޕޮލިސް ނުވަތަ އެކަމަށް ކަނޑައަޅާފައިވާ ފުލުހުންގެ އިސް އޮފިސަރެއްގެ ޚާއްސަ ހުއްދައެއް ލިބިގެންނެވެ. ކޮންމެ އޮޕަރޭޝަނަކަށް ވަކިވަކިން ހުއްދަ ހޯދަންޖެހޭއިރު، އެ ހުއްދަ ދިނުމުގައި މައްސަލައިގެ ބާވަތަށާއި، ސަލާމަތީ ކަންކަމުގެ އިތުރުން ތަހުގީގަށް ލިބޭނެ ކުރިއެރުމަށް ރިއާޔަތްކުރަންޖެހެއެވެ. މީގެ އިތުރުން، މިފަދަ އޮޕަރޭޝަންތަކުގައި މަސްތުވާތަކެތީގެ ބަދަލުގައި އެހެން އެއްޗެއް ބޭނުންކުރުމާއި، އޮޕަރޭޝަންގެ ރިޕޯޓްތައް ބެލެހެއްޓުމުގެ އުސޫލުތައްވެސް މި ޤަވައިދުގައި ބަޔާންކޮށްފައިވެއެވެ.
ކުޑަކަމުދާ ތަކެތީގެ ސާމްޕަލް ނެގުމާ ގުޅޭގޮތުން މި ޤަވައިދަށް ގެނެވުނު އެންމެ ބޮޑު އެއް ބަދަލަކީ، ސާމްޕަލް ދިނުމަށް އިންކާރުކުރާ ކަމަށް ބެލެވޭނެ ވަގުތު 12 ގަޑިއިރަށް ކުޑަވެގެން ދިއުމެވެ. މީގެ އިތުރުން، ސާމްޕަލް ދޭންޖެހޭ ފަރާތަށް އެކަން އެންގުމާއި، ސާމްޕަލް ނެގުމާއި، އެ ތަކެތި ރައްކާތެރިކަމާއެކު ލެބޯޓްރީއަށް ފޮނުވުމުގެ ނިޒާމެއް މި ޤަވައިދުން ވަނީ ގާއިމުކޮށްފައެވެ. އަދި ފުލުހުންގެ ފޮރެންސިކް ލެބޯޓްރީ ނޫން އެހެން ލެބޯޓްރީއަކުން ސާމްޕަލް ތަހުލީލުކުރުމަށް އެދުމުގެ ފުރުސަތުވެސް ތުހުމަތުކުރެވޭ ފަރާތަށް ލިބިގެންވެއެވެ.
ދިވެހި ފުލުހުންގެ ޚިދުމަތުން ވިދާޅުވި ގޮތުގައި، މި ޤަވައިދުގެ ސަބަބުން މަސްތުވާތަކެތީގެ ތަހުގީގުތައް ޖަވާބުދާރީވަނިވި ގޮތެއްގައި ކުރިއަށް ގެންދިއުމަށް މަގުފަހިވެ، ތަހުގީގުކުރާ ފަރާތްތަކަށް ބޮޑެތި ފަސޭހަތަކެއް ލިބިގެންދާނެއެވެ. މިއީ މަސްތުވާތަކެތީގެ ވިޔަފާރިއާއި ބޭނުންކުރުން ހުއްޓުވުމަށް ސަރުކާރުން ކުރަމުންދާ މަސައްކަތްތަކަށް ލިބުނު މުހިންމު ކުރިއެރުމެއް ކަމަށާއި، މީގެ ސަބަބުން މުޖުތަމައުގެ ރައްކާތެރިކަން އިތުރުވެގެންދާނެ ކަމަށްވެސް ފުލުހުން ފާހަގަކުރައްވައެވެ.
