ކުރީގެ ރައީސް މުޙައްމަދު ނަޝީދު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ. ގދ. ތިނަދޫގައި ބޭއްވި ކެމްޕޭން ޖަލްސާއެއްގައި ވާހަކަފުޅުދައްކަވަމުން އެ މަނިކުފާނު ވަނީ މި ސަރުކާރުން ފެންނަނީ ކުރީގެ ޚުދުމުޚުތާރު ވެރިކަމެއްގެ ސިފަތަކެއް ކަމަށް ވިދާޅުވެފައެވެ.
ރައީސް ނަޝީދު ފާހަގަކުރެއްވި ގޮތުގައި ރައްޔިތުން އިންތިޚާބުކޮށްފައިވާ ކައުންސިލަރުން ސަސްޕެންޑްކުރުން ފަދަ ކަންކަމަކީ ބަލައިގަނެވޭނެ ކަންކަމެއް ނޫނެވެ. މިފަދަ އަމަލުތަކުގެ ސަބަބުން ޑިމޮކްރެޓިކް ނިޒާމަށް ބުރޫއަރާކަން އެ މަނިކުފާނު ފާހަގަކުރެއްވިއެވެ.
އެއްވެ އުޅުމުގެ މިނިވަންކަމާއި ސިޔާސީ ހަރަކާތްތަކަށް ހުރަސްއެޅުމަކީ "ރަތް ރޮނގެއް" ކަމަށް ސިފަކުރައްވައި، ނަޝީދު ވަނީ ސަރުކާރަށް ހަރުކަށި އިންޒާރެއް ދެއްވާފައެވެ. އެ މަނިކުފާނު ވިދާޅުވީ އެ ރޮނގު ހުރަސްކޮށްފިނަމަ، ސަރުކާރަށް އޮތް ތާއީދު ފަސް އިންސައްތައަށް ދަށްކޮށްލާނެ ކަމަށެވެ.
ފަހުގެ އިންތިޚާބުތަކުން ސަރުކާރަށް ލިބުނު ނާކާމިޔާބީތަކަށް އަލިއަޅުއްވާލައްވަމުން، ރައީސް ނަޝީދު ވިދާޅުވީ މި ސަރުކާރަށް އޮތް ރައްޔިތުންގެ ތާއީދު ހަލުވިކަމާއެކު ގެއްލެމުންދާ ކަމަށެވެ. މިއީ ސަރުކާރުގެ ސިޔާސަތުތަކާމެދު ރައްޔިތުން ހިތްހަމަނުޖެހޭކަމުގެ ހެއްކެއްގެ ގޮތުގައި އެ މަނިކުފާނު ބަޔާންކުރެއްވިއެވެ.
