ދިވެހި ސިވިލް ސާވިސްގެ 35 މުވައްޒަފަކު ތަމްރީނު ޕްރޮގްރާމެއްގައި ބައިވެރިވުމަށް އިންޑިއާގެ ދެހްރާދޫނަށް ފުރައިފިއެވެ. މި މުވައްޒަފުންނަށް އަލްވަދާއު ކިޔުމަށް ބޭއްވި ރަސްމިއްޔާތުގައި އިންޑިއާއިން ރާއްޖެއަށް ކަނޑައަޅާފައި ހުންނަވާ ޑެޕިއުޓީ ހައި ކޮމިޝަނަރު ގޯރަވް ދީމާން ބައިވެރިވެވަޑައިގެންނެވިއެވެ.
މި ތަމްރީނު ޕްރޮގްރާމަކީ އިންޑިއާގެ ނޭޝަނަލް ސެންޓަރ ފޯ ގުޑް ގަވަރނަންސް (އެން.ސީ.ޖީ.ޖީ) އިން އިންތިޒާމުކޮށްގެން ކުރިއަށްގެންދާ ހާއްސަ މޮޑިއުލްއެކެވެ. މި ޕްރޮގްރާމް ކުރިއަށް ދިއުމަށް ހަމަޖެހިފައިވަނީ ޖޫން 8 އިން 19، 2026 ގެ ނިޔަލަށެވެ.
މި ދަތުރަކީ އިންޑިއާގެ އެން.ސީ.ޖީ.ޖީ އާއި ރާއްޖޭގެ ސިވިލް ސާވިސް ކޮމިޝަން (ސީ.އެސް.ސީ) އާ ދެމެދު ސޮއިކޮށްފައިވާ ފަހުމުނާމާގެ ދަށުން ކުރިއަށްގެންދާ ހަރަކާތެކެވެ. މި ފަހުމުނާމާގެ މަގްސަދަކީ ދިވެހި ސިވިލް ސާވިސް މުވައްޒަފުންގެ ހުނަރާއި ގާބިލުކަން އިތުރުކުރުމެވެ.
މި ތަމްރީނު މޮޑިއުލްގެ ތެރެއިން ސިވިލް ސާވިސްގެ މުވައްޒަފުންނަށް ހިންގުމުގެ ދާއިރާއިންނާއި، ހެޔޮވެރިކަމުގެ އުސޫލުތަކާ ގުޅޭގޮތުން މުހިންމު މައުލޫމާތުތަކާއި ތަޖުރިބާތަކެއް ލިބިގެންދާނެއެވެ. މިއީ ދެ ގައުމުގެ ދެމެދުގައި އޮތް ގާތް ގުޅުމުގެ ދަށުން ކުރިއަށްދާ މުހިންމު މަސައްކަތެކެވެ.
