ރާއްޖޭގެ މާލީ ދާއިރާ ކުރިއެރުވުމަށާއި އާންމުން ހޭލުންތެރިކުރުވުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިންތިޒާމުކުރާ "މޯލްޑިވްސް ފައިނޭންޝަލް އެކްސްޕޯ" ގައި ބައިވެރިވުމަށް ދީފައިވާ މުއްދަތު އެ އޮތޯރިޓީން އިތުރުކޮށްފިއެވެ.
އެމްއެމްއޭއިން ހާމަކޮށްފައިވާ ގޮތުގައި، މި އެކްސްޕޯގައި ބައިވެރިވުމަށް ޝައުގުވެރިވާ ފަރާތްތަކަށް މިހާރު ވަނީ އަންނަ ހޮނިހިރު ދުވަހުގެ ނިޔަލަށް ފުރުސަތު ހުޅުވާލާފައެވެ. މިއީ މާލީ ދާއިރާގައި ހަރަކާތްތެރިވާ ފަރާތްތަކަށް އެ ފަރާތްތަކުގެ ހިދުމަތްތައް އިޝްތިހާރުކޮށް، އާންމުންނާ ގާތުން ބައްދަލުކުރުމަށް ލިބޭ ރަނގަޅު ފުރުސަތެކެވެ.
މި އަހަރުގެ ފައިނޭންޝަލް އެކްސްޕޯ ބޭއްވުމަށް ހަމަޖެހިފައިވަނީ ޖުލައި މަހުގެ 2 އިން 4 އަށް ހުޅުމާލެ ސެންޓްރަލް ޕާކުގައެވެ. މި ހަރަކާތުގެ މައިގަނޑު މަގްސަދަކީ މާލީ ކަންކަމާ ގުޅޭގޮތުން އާންމުންގެ ހޭލުންތެރިކަން އިތުރުކުރުމާއި، މާލީ ހިދުމަތްދޭ އިދާރާތަކާއި ކަސްޓަމަރުން އެއް ފުރާޅެއްގެ ދަށުން ބައްދަލުވެ، މައުލޫމާތު ބަދަލުކުރުމުގެ މަގު ފަހިކޮށްދިނުމެވެ.
މީގެ ކުރިން 2015 އަދި 2017 ވަނަ އަހަރު ބޭއްވި އެކްސްޕޯތަކަށް އާންމުންގެ ފަރާތުން ބޮޑު ތަރުހީބެއް ލިބިފައިވާކަން އެމްއެމްއޭއިން ފާހަގަކުރެއެވެ. އެހެން އަހަރުތަކެކޭ އެއްފަދައިން، މި އަހަރުގެ އެކްސްޕޯގައިވެސް މާލީ އިދާރާތަކުން ފޯރުކޮށްދޭ އާ ހިދުމަތްތަކާއި، ހާއްސަ ޕްރޮގްރާމްތައް ތައާރަފްކުރުމަށް ވަނީ ރާވާފައެވެ.
މި އެކްސްޕޯގެ ސަބަބުން ރާއްޖޭގެ މާލީ ނިޒާމަށް އާންމުން އަހުލުވެރިވެ، އިގްތިސާދީ ގޮތުން ހޭލުންތެރި މުޖުތަމައެއް ބިނާކުރުމަށް ބޮޑު އެހީތެރިކަމެއް ލިބިގެންދާނެ ކަމަށް އެމްއެމްއޭއިން އުންމީދުކުރެއެވެ.
