ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ކޮންގްރެސް ބޭއްވުމަށް ކުރިން ކަނޑައެޅި ތާރީޚު އޯލެވެލް އިމްތިހާނާ ދިމާވާތީ، އެއަށްވުރެ އަވަހަށް ކޮންގްރެސް ބޭއްވުމަށް އެ ޕާޓީގެ އާންމު މަޖިލީހުން ރޭ ވަނީ ފާސްކޮށްފައެވެ. ކުރިން ނިންމާފައި އޮތީ އޮކްޓޫބަރު މަހުގެ ތެރޭގައި މި ކޮންގްރެސް ބޭއްވުމަށެވެ.
ޕީއެންސީން މަޢުލޫމާތު ދިން ގޮތުގައި، ކޮންގްރެސް ބާއްވާ ތާރީޚު އަވަސްކުރުމަށް އާންމު މަޖިލީހަށް ހުށަހެޅުއްވީ ޕާޓީގެ ރައީސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. މި ހުށަހެޅުން ފާސްކޮށްފައިވަނީ ބައްދަލުވުމުގައި ބައިވެރިވި މެންބަރުންގެ އިއްތިފާގުންނެވެ. ކޮންގްރެސް ބާއްވާނެ އާ ތާރީޚެއް އެ ޕާޓީން ވަރަށް އަވަހަށް ރަސްމީކޮށް އިޢުލާން ކުރާނެއެވެ.
މި ކޮންގްރެސްއާ ގުޅޭގޮތުން ރައީސް މުޢިއްޒު މީގެ ކުރިން ވިދާޅުވެފައިވަނީ، މިއީ ޕާޓީގެ ތެރެއިން ސިޔާސީ ގޮތުން ކުރިއަށްދާން ބޭނުންވާ ފަރާތްތަކަށް ލިބޭނެ ވަރަށް މުހިއްމު ފުރުސަތެއް ކަމަށެވެ. އަދި މި ކޮންގްރެސް ވެގެންދާނީ ވަރަށް އިންސާފުވެރި އަދި ދެފުށް ފެންނަ ހަރަކާތަކަށް ކަމަށްވެސް އެމަނިކުފާނު ވަނީ ވިދާޅުވެފައެވެ.
ޕީއެންސީގެ މެންބަރުންގެ އަދަދު މިހާރު 75,000 އަށް އަރާފައިވާއިރު، ޕާޓީގެ އަމާޒަކީ މެންބަރުންގެ އަދަދު އެއްލައްކައަށް ވުރެ އިތުރުކުރުމެވެ. ރައީސް ވިދާޅުވި ގޮތުގައި އެ ޕާޓީން އަބަދުވެސް މަސައްކަތް ކުރާނީ ރައްޔިތުންގެ މަސްލަހަތު އިސްކޮށް، ޑިމޮކްރެޓިކް އުސޫލުތަކުގެ މަތިން އެއް ޓީމެއްގެ ގޮތުގައެވެ.
