ދުންފަތުގެ ނުރައްކާތެރި ވަބާއިން ޒުވާނުން ސަލާމަތްކޮށް، ދުޅަހެޔޮ މުޖުތަމައެއް ބިނާކުރުމަށް ސަރުކާރުން ކުރަމުންދާ މަސައްކަތްތައް ހުއްޓުމެއް ނެތި ކުރިއަށްގެންދާނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ދެއްވައިފިއެވެ. ރައީސް މިކަން ހާމަކުރެއްވީ ދުނިޔޭގެ ދުންފަތުގެ އިސްތިއުމާލުކުރުމާ ދެކޮޅަށް މަސައްކަތްކުރާ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ.
ރައީސްގެ މެސެޖުގައި ވިދާޅުވީ، ދިވެހި ރައްޔިތުން ނިކޮޓިންގެ ވަބާއިން ސަލާމަތްކުރުމަކީ ސަރުކާރުގެ މުހިންމު އަމާޒެއް ކަމަށެވެ. އެގޮތުން އީ-ސިގްރޭޓް މަނާކުރުމާއި، ދުންފަތުން އެއްކޮށް ދުރުވެފައިވާ ޖީލެއް ބިނާކުރުމަށްޓަކައި 'ޖެނެރޭޝަނަލް ބޭން' ތައާރަފުކުރި ދުނިޔޭގެ ފުރަތަމަ ގައުމުތަކުގެ ތެރޭގައި ރާއްޖެ ހިމެނުމަކީ މި ލަނޑުދަނޑި ހާސިލުކުރުމަށް އެޅުނު ހަރުދަނާ ފިޔަވަޅެއްގެ ގޮތުގައި އެމަނިކުފާނު ފާހަގަކުރެއްވިއެވެ.
ޒުވާނުންނަށް އަމާޒުކޮށްގެން ދުންފަތް ޕްރޮމޯޓްކުރުމަށް ބޭނުންކުރާ އާ އުކުޅުތަކަށް ސަރުކާރުން ސަމާލުވެ އޮތްކަން ހާމަކުރައްވަމުން ރައީސް ވިދާޅުވީ، "ޒުވާނުންނަށް އަމާޒުކޮށްގެން އާޓިފިޝަލް އިންޓެލިޖެންސް ބޭނުންކޮށްގެން ކުރިއަށްގެންދާ މާކެޓިންގެ އުކުޅުތަކާއި، ރަހަލީ ނިކޮޓިން ޕައުޗްތައް ފަދަ އާ ނުރައްކާތައް ކުރިމަތިވަމުންދާއިރު، އަޅުގަނޑުމެން މިކަމުގައި ނުހަނު ސަމާލުވެ ތިބޭނަން" ކަމަށެވެ. މީގެ އިތުރުން ދުންފަތުގެ ދުމުން ސަލާމަތްވެފައިވާ ސަރަހައްދުތައް އިތުރުކޮށް، ގާނޫނީ އޮނިގަނޑު ހަރުދަނާކުރުމުގެ މަސައްކަތް ކުރިއަށްދާނެ ކަމަށްވެސް ވިދާޅުވިއެވެ.
ރައީސުލްޖުމްހޫރިއްޔާގެ މެސެޖު ނިންމަވާލެއްވީ، ދުންފަތުގެ ވަބާއިން ސަލާމަތްވެފައިވާ ދުޅަހެޔޮ ރާއްޖެއެއް ބިނާކުރުމަށްޓަކައި ހުރިހާ ރައްޔިތުން ގުޅިގެން މަސައްކަތް ކުރުމަށް އިލްތިމާސް ކުރައްވަމުންނެވެ. މި މަސައްކަތުގައި ސަރުކާރުގެ ސިޔާސަތަކީ ދުންފަތުގެ އިސްތިއުމާލުކުރުން ހުއްޓާލަން ބޭނުންވާ ފަރާތްތަކަށް ބޭނުންވާ އެހީތެރިކަމާއި ހިދުމަތްތައް ފުޅާކޮށް، އަންނަން އޮތް ޖީލުތައް މި ނުރައްކަލުން ރައްކާތެރިކުރުން ކަމަށް އެމަނިކުފާނު ވިދާޅުވިއެވެ.
