މާލެއާއި ހުޅުމާލޭގައި ފުލުހުން ހިންގި ހާއްސަ އޮޕަރޭޝަނެއްގައި ފަސް އެޕާޓްމެންޓެއް ބަލައި ފާސްކޮށް، މަސްތުވާތަކެއްޗާއެކު ހަތަރު މީހަކު ހައްޔަރުކޮށްފިއެވެ. މި އޮޕަރޭޝަނަކީ ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް ގުޅިގެން، މަސްތުވާތަކެތީގެ ވިޔަފާރިކުރާ ނެޓްވޯކްތައް ހޯދައި ހުއްޓުވުމަށް ހިންގި ހަރަކާތެކެވެ.
މި އޮޕަރޭޝަނުގެ ތެރެއިން ކޯޓު އަމުރެއްގެ ދަށުން ފަސް އެޕާޓްމެންޓެއް ބަލައި ފާސްކޮށްފައިވާއިރު، ފުލުހުންގެ ބެލުމުގެ ދަށަށް ގެންދިޔަ ހަތަރު މީހުންގެ މައްޗަށް ވަނީ ގާނޫނީ ގޮތުން ބޮޑެތި ތުހުމަތުތަކެއް ކުރެވިފައެވެ. މި އޮޕަރޭޝަނުގެ މައިގަނޑު އަމާޒަކީ މުޖުތަމައުގައި މަސްތުވާތަކެތި ބޭނުންކުރުމާއި، ގެންގުޅުމުގެ އިތުރުން އެ ތަކެތީގެ ވިޔަފާރި ފުޅާދާއިރާއެއްގައި ކުރާ ފަރާތްތައް ހޯދައި ގާނޫނީ ފިޔަވަޅު އެޅުމެވެ.
ހައްޔަރުކުރެވުނު ހަތަރު މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، މައްސަލައިގެ ކުޑަބޮޑުމިނަށް ރިއާޔަތްކޮށް ކޯޓުން ވަނީ އެމީހުންގެ ބަންދަށް މުއްދަތު ޖަހައިދީފައެވެ. އެގޮތުން ދެ މީހެއްގެ ބަންދަށް 15 ދުވަސް އިތުރުކޮށްފައިވާއިރު، އަނެއް ދެ މީހުންގެ ބަންދަށް ވަނީ 5 ދުވަސް ޖަހާފައެވެ.
މީގެ އިތުރުން، މަސްތުވާތަކެތީގެ މައްސަލަތައް ހުއްޓުވުމަށް ފުލުހުން ކުރަމުންދާ މަސައްކަތުގެ ތެރެއިން، ޑްރޯންއެއް ބޭނުންކޮށްގެން މާފުށީ ޖަލަށް މަސްތުވާތަކެތި އެތެރެކުރަން އުޅުނު މައްސަލައެއްވެސް ވަނީ ހުއްޓުވާފައެވެ.
