ރާއްޖޭގެ ވ. އަތޮޅުގެ ހޮހަޅައަކަށް ޑައިވިންއަށް ގޮސް އުޅެނިކޮށް ހިނގި ހިތާމަވެރި ހާދިސާއެއްގައި މަރުވި އިޓަލީގެ ފަސް ފަތުރުވެރިންގެ ހަށިގަނޑުތަކުގެ ޕޯސްޓްމޯޓަމް ހެދުމުގެ މަސައްކަތް އިޓަލީގެ ލޮމްބާޑީ ސަރަހައްދުގެ ގަލަރޭޓް ހޮސްޕިޓަލުގައި މިހާރު ވަނީ ފަށާފައެވެ. މި މަސައްކަތްތައް ކޯޑިނޭޓް ކުރައްވާ ފޮރެންސިކް ސައިންޓިސްޓް ލޫކާ ތަޖާނާ ހާމަކުރެއްވި ގޮތުގައި، މިހާތަނަށް ކުރެވުނު ތަހުލީލުތަކުން ހަށިގަނޑުން އާދަޔާ ހިލާފު ކަމެއް ފެނިފައި ނުވި ނަމަވެސް، ބޮޑަށް ބެލެވެނީ އެ މީހުން މަރުވީ ނޭވާ ހާސްވެގެން ގެނބިގެން ކަމަށެވެ.
މި ހާދިސާގައި މަރުވެފައިވަނީ ޑައިވިން އިންސްޓްރަކްޓަރު ޖިއަންލޫކާ ބެނެޑެޓީގެ އިތުރުން ފެޑެރިކޯ ގުއަލްޓިއޭރީ އާއި، ޔުނިވާސިޓީ އޮފް ޖެނޯއާގެ ޕްރޮފެސަރެއް ކަމަށްވާ މޮނިކާ މޮންޓެފަލްކޯން އާއި އޭނާގެ ދަރިފުޅު ޖިއޯޖިއާ ސޮމަކާލް އަދި މުރިއަލް އޮޑެނީނޯއެވެ. މީގެ ތެރެއިން ހަތަރު މީހެއްގެ ހަށިގަނޑު ފެނިފައިވަނީ ހޮހަޅައިގެ ތިންވަނަ ޗެމްބަރުގެ ތެރެއިން 165 ފޫޓު އަޑިންނެވެ. ޖިއަންލޫކާ އާއި ފެޑެރިކޯގެ އޮޓޯޕްސީ އިއްޔެ ނިންމާލާފައިވާއިރު، ބާކީ ތިބި ތިން މީހުންގެ ތަހުލީލުތައް މިއަދު ކުރިއަށްދާނެއެވެ.
އިޓަލީގެ ޕްރޮސެކިއުޓަރުން އަންނަނީ މި ދަތުރަކީ ޔުނިވާސިޓީގެ ރަސްމީ ސައިންޓިފިކް މިޝަނެއްގެ ބައެއްތޯ ނުވަތަ އަމިއްލަ ދަތުރެއްތޯ ބަލައި އިތުރު ތަހުގީގުތައް ހިންގަމުންނެވެ. ޔުނިވާސިޓީން އެއީ ރަސްމީ މަސައްކަތެއް ނޫން ކަމަށް ބުނި ނަމަވެސް، އާއިލާތަކުގެ ވަކީލުން ވަނީ އެކަމާ ސުވާލު އުފައްދާފައެވެ. މީގެ އިތުރުން، އެ މީހުން ބޭނުންކުރި "ގޯ-ޕްރޯ" ކެމެރާތަކުގެ ފުޓޭޖްތައް ދިރާސާކޮށް، އެހާ ފުނުގައި އޮތް ނުރައްކާތެރި ހޮހަޅައަކަށް އެ މީހުން ވަދެވުނު ސަބަބު ދެނެގަތުމުގެ މަސައްކަތް ވެސް ދަނީ ކުރަމުންނެވެ.
މެޑިކޯ-ލީގަލް މާހިރުން ވިދާޅުވާ ގޮތުގައި މަރުގެ ސީދާ ސަބަބު ކަށަވަރު ކުރެވޭނީ ހަށިގަނޑުން ނެގިފައިވާ ސުންކުތަކުގެ ޓޮކްސިކޮލޮޖީ އަދި ހިސްޓޮލޮޖިކަލް ތަހުލީލުތަކަށް ފަހުގައެވެ. ފޮރެންސިކް މާހިރު ލޫކާ ތަޖާނާގެ ފައިނަލް ރިޕޯޓް ކުރިއަށް އޮތް 90 ދުވަހުގެ ތެރޭގައި ކޯޓަށް ހުށަހަޅާނެ ކަމަށް ބެލެވެއެވެ. މި ހިތާމަވެރި ހާދިސާއާ ގުޅިގެން ރާއްޖޭގެ ކަމާބެހޭ ފަރާތްތަކުން ވެސް ވަނީ މައުލޫމާތު އެއްކޮށް ތަހުގީގަށް އެހީތެރިކަން ފޯރުކޮށްދީފައެވެ.
