މި ހާދިސާގައި ގެއްލުނު ފަސް މީހުންގެ ތެރެއިން ޑައިވިން އިންސްޓްރަކްޓަރުގެ ހަށިގަނޑު މިހާރު ވަނީ ފެނިފައެވެ. އެމްއެންޑީއެފުން މައުލޫމާތު ދިން ގޮތުގައި އޭނާގެ ހަށިގަނޑު ފެނިފައިވަނީ ބުރާސްފަތި ދުވަހުގެ އިރުއޮއްސި 18:13 ހާއިރު، ކަނޑުގެ 60 މީޓަރު އަޑީގައި އޮތް ހޮހަޅައެއްގެ ތެރެއިންނެވެ. ނަމަވެސް، އެ ގްރޫޕުގައި ހިމެނޭ އިޓަލީގެ ހަތަރު ފަތުރުވެރިން އަދިވެސް ފެނިފައި ނުވާތީ، އެމީހުން ހޯދުމުގެ މަސައްކަތް މެދުކެނޑުމެއްނެތި ދަނީ ކުރަމުންނެވެ.
ޓޫރިޒަމް މިނިސްޓްރީން ވަނީ ރާއްޖެއަކީ ރައްކާތެރި މަންޒިލެއްގެ ގޮތުގައި ބޭއްވުމަށްޓަކައި ހުރިހާ ފަރާތްތަކަކުންވެސް ގަވާއިދުތަކަށް ފުރިހަމައަށް އަމަލުކުރުމަށް އިލްތިމާސްކޮށްފައެވެ. އަދި ފަތުރުވެރިންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި އަޅަންޖެހޭ އެންމެހާ ފިޔަވަޅުތައް ވަރުގަދަކުރާނެ ކަމުގެ ޔަގީންކަންވެސް އެ މިނިސްޓްރީން ވަނީ ދީފައެވެ.
