މި ދުވަހުގެ މުނާސަބަތުގައި ރައީސުލްޖުމްހޫރިއްޔާ މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ކޮންމެ އާއިލާއެއްގެވެސް އަސްލަކީ އަދި ފެށުމަކީ މައިންބަފައިން ކަމަށެވެ. އަދި މާތްﷲގެ އެއްކައުވަންތަކަން ގަބޫލުކުރުމަށްފަހު، މުސްލިމަކު އެންމެ ބޮޑު އިސްކަމެއް ދިނުމަށް އަމުރުވެވިގެންވަނީ މައިންބަފައިންނަށް ހެޔޮކޮށް ހިތުމާއި ކިޔަމަންގަތުމަށްކަން އެމަނިކުފާނު ފާހަގަކުރެއްވިއެވެ. މިއީ އިސްލާމްދީނުގައި އާއިލީ ގުޅުމަށް ދީފައިވާ މަތިވެރި ގަދަރާއި އަހުމިއްޔަތު ހާމަކޮށްދޭ ކަމެއް ކަމަށްވެސް ރައީސް ވިދާޅުވިއެވެ.
އާއިލީ ގުޅުމުގެ މުހިންމުކަމުގެ މައްޗަށް އަލިއަޅުއްވާލައްވަމުން ރައީސް ވިދާޅުވީ، އާއިލާއަކީ ދުވަހަކުވެސް ކެނޑިގެން ނުދާނެ ފަދަ މަތިވެރި ލޭގެ ގުޅުމެއް ކަމަށެވެ. އަދި ގައުމެއްގެ އިޖުތިމާއީ ފޭރާން ވަރުގަދަކޮށް އިސްލާހުކުރުމުގެ އެންމެ މުހިންމު ބިންގަލަކީ ބަދަހި އަދި ހަރުދަނާ އާއިލާތަކެއް ބިނާކުރުން ކަމުގައި އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ މެސެޖު ނިންމަވާލެއްވީ، ދިވެހި ކޮންމެ ރައްޔިތަކަށްމެ އާއިލީ ލޯތްބާއި އަޅައިލުން ލިބިގެންވާ ބާއްޖަވެރި ހަޔާތަކަށް އެދި ދުއާކުރައްވަމުންނެވެ.
"ދިވެހި ކޮންމެ ރައްޔިތަކަށްމެ އާއިލީ ލޯތްބާއި އަޅައިލުމާއެކު ބާއްޖަވެރި ހަޔާތަކަށް އެދި ދުއާކުރަމުން މި އުފާވެރި ދުވަހުގެ ތަހުނިޔާ އަރިސްކުރަން،" ރައީސް ވިދާޅުވިއެވެ.
