ޕީޕަލްސް ނޭޝަނަލް ފްރަންޓް (ޕީއެންއެފް) އިން ވަނީ މި ތިން ބޭފުޅުން ބައްދަލުކުރައްވާކަން ކަށަވަރުކޮށްދީފައެވެ. ނަމަވެސް މި ބައްދަލުވުމާ ގުޅޭ އިތުރު ތަފްސީލެއް އެ ޕާޓީން އަދި ހާމަކޮށްފައެއް ނުވެއެވެ. ބެލެވޭ ގޮތުގައި މި ބައްދަލުވުމަކީ ނޫސްވެރިކަމުގެ މިނިވަންކަން އިޔާދަކުރުމަށް އެކުގައި މަސައްކަތް ކުރެއްވުމަށް ރައީސް ޔާމީން ބުދަ ދުވަހު އިޢުލާނު ކުރެއްވުމާ ގުޅިގެން ކުރިއަށްދާ މަސައްކަތެކެވެ.
ނޫސްވެރިކަމުގެ މިނިވަންކަމުގެ މައްސަލަ ހޫނުވެފައިވަނީ 'އަދަދު' ނޫހުގެ ދެ ނޫސްވެރިން ކަމަށްވާ ލީވާން އަލީ ނަސީރާއި މުހައްމަދު ޝަހުޒާން، ކޯޓު އަމުރަކާ ޚިލާފުވި ކަމަށް ބުނެ ކްރިމިނަލް ކޯޓުން އިއްޔެ ޖަލަށްލުމަށް ހުކުމް ކުރުމާ ގުޅިގެންނެވެ.
މި މަސައްކަތަކީ ގައުމުގެ ހާލަތު ބަދަލުކުރުމަށްޓަކައި ސިޔާސީ ޚިޔާލުތަފާތުވުންތައް އެއްކިބާކޮށް، ތިން ރައީސުން އެކުގައި މަސައްކަތް ކުރެއްވުމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް ގޮވާލެއްވި ގޮވާލެއްވުމަށް އިޖާބަދެއްވައި ފެށިގެން އުޅޭ ހަރަކާތެކެވެ.
