ސައިކަލެއް ކަހާލައިގެން ޕިކަޕެއްގެ ދަށުވެ ހިނގި ނުރައްކާތެރި އެކްސިޑެންޓެއްގައި މީހަކު ނިޔާވެއްޖެ

ހުޅުމާލެއިން މާލެއަށް ދަތުރުކުރާ ހައިވޭގައި މިރޭ ހިނގި ނުރައްކާތެރި އެކްސިޑެންޓެއްގައި އަނިޔާވި މީހަކު ނިޔާވެއްޖެއެވެ. މި ހާދިސާ ހިނގާފައިވަނީ ހައިވޭގެ އެއާޕޯޓު ލައިޓް ކައިރީގައެވެ.

ފުލުހުންގެ އިދާރާއަށް މި އެކްސިޑެންޓްގެ މައުލޫމާތު ރިޕޯޓުކޮށްފައިވަނީ މިރޭ 22:12 އެހައިކަންހާއިރު ކަމަށް ފުލުހުން މައުލޫމާތު ދެއެވެ. މި ހާދިސާ ހިނގި ސަރަހައްދުގައި ފުލުހުން ދަނީ ހަރަކާތްތެރިވަމުންނެވެ.

މި އެކްސިޑެންޓް ހިނގަން މެދުވެރިވި ގޮތުގެ ތަފްސީލް ހިއްސާކުރަމުން ފުލުހުން ވިދާޅުވީ، އެކްސިޑެންޓްވީ ސައިކަލެއް ކަހާލައިގެން ވެއްޓުނު ވަގުތު، އެ ސަރަހައްދުން ދަތުރުކުރި ޕިކަޕެއްގެ ދަށުވެގެން ކަމަށެވެ. މި ހިތާމަވެރި ހާދިސާގައި ސައިކަލު ދުއްވަން އިން މީހާއަށް ބޮޑެތި އަނިޔާތަކެއް ލިބި، ވަނީ ނިޔާވެފައެވެ.

މި މައްސަލަ ފުލުހުން މިހާރު ގެންދަނީ އިތުރަށް ތަހުގީގު ކުރަމުންނެވެ. ފުލުހުން ވިދާޅުވި ގޮތުގައި މި ހާދިސާއާ ގުޅޭ އިތުރު މައުލޫމާތު ލިބެމުންދާ ވަރަކަށް އާންމުންނާ ހިއްސާ ކުރަމުންދާނެއެވެ.