ޚުތުބާގައި ބަޔާންކޮށްފައިވާ ގޮތުގައި، މަރަކީ އެއްވެސް މީހަކަށް އިންކާރު ނުކުރެވޭނެ ޙަޤީޤަތެކެވެ. ދުނިޔޭގައި އެއްކުރި މުދަލާއި، އަނބިދަރިންނާއި، ގެދޮރާއި، ވިޔަފާރި ފަދަ ހުރިހާ ޒީނަތެއް ދޫކޮށް ވަކިވާންޖެހޭ ވަގުތަކީ އާދައިގެ ވަގުތެއް ނޫން ކަމަށް ޚުތުބާގައި ފާހަގަކުރިއެވެ. އެހެންކަމުން، ނުބައި ކަންކަމުން ދުރުވެ، ހެޔޮ ޢަމަލުތައް ގިނަކުރުމަށް ވަނީ އިލްތިމާސްކޮށްފައެވެ.
ކީރިތި ރަސޫލާ ﷺ ގެ ޙަދީޘްފުޅުތަކުން މިސާލު ދައްކަވަމުން ޚުތުބާގައި ބުނީ، ކަށްވަޅުގެ ބިރުވެރިކަމަށް ވިސްނައި، އެ ދުވަހަށް ތައްޔާރުވުމަކީ ކޮންމެ މުސްލިމެއްގެ މައްޗަށް އޮތް ކަމެއް ކަމަށެވެ. ކީރިތި ރަސޫލާ ﷺ ވެސް ކަށްވަޅެއްގެ ކައިރީގައި އިންނަވައި ކީރިތި ކުރައްވައި، އެ ދުވަހަށް ތައްޔާރުވުމަށް އަޞްޙާބު ބޭކަލުންނަށް ވަޞިއްޔަތް ކުރެއްވިކަން ޚުތުބާގައި ހަނދާންކޮށްދިނެވެ.
މަރުން ރެކިގަނެވޭނެ އެއްވެސް މީހަކު ނުވާނެކަން ފާހަގަކުރައްވައި ޚުތުބާގައި ބުނީ، މީހަކީ ކިތަންމެ އާރާއި ބާރު ހުރި މީހެއް ކަމުގައި ވިޔަސް، ނުވަތަ ގަދަފަދަ ކިއްލާއެއްގެ ތެރޭގައި ހުރި މީހެއް ކަމުގައި ވިޔަސް މަރު އައިސް އޭނާ އަތުލާނެ ކަމަށެވެ. މަރު އަންނަނީ އެއްވެސް މީހެއްގެ ހުއްދަ ހޯދައިގެން ނޫން ކަމަށާއި، މާތް اللهގެ އަމުރުފުޅު އައުމުން އެއްވެސް ލަސްކުރުމެއް ނެތި ފުރާނަ ހިއްޕަވާނެ ކަމަށް ޚުތުބާގައި ބުންޏެވެ.
ޚުތުބާ ނިންމާލަމުން ބުނީ، މަރުވުމުގައި މީހާގެ ޢުމުރަކަށް، ބަލިޙާލަތަކަށް، ނުވަތަ މުއްސަނދިކަމާއި ފަޤީރުކަމަކަށް ބެލުމެއް ނޯންނާނެ ކަމަށެވެ. އެހެންކަމުން، ކޮންމެ ވަގުތަކުވެސް މަރު އަތުވެދާނެ ކަމަށް ބަލައި، އަބަދުވެސް ތައުބާވެ، ހެޔޮމަގުގައި ސާބިތުވެ ތިބުމަށް ހުރިހާ މުސްލިމުންނަށް ޚުތުބާގައި ވަނީ ގޮވާލާފައެވެ.
