އިސްލާމްދީނުގައި ކޮންމެ އަމަލެއްވެސް މިނެކިރެނީ ހަމައެކަނި އޭގެ ވަގުތީ ނަތީޖާއަކަށް ބަލައިގެނެއް ނޫނެވެ. އޭގެ ބަދަލުގައި އެ އަމަލެއްގެ ނިޔަތަށާއި، އަދުލުވެރިކަމަށް އެ އަމަލުން ކުރާނެ އަސަރަށްވެސް ބަލައެވެ. މިއަދުގެ ހާލަތަށް ބަލާއިރު، ވޯޓުލުމަކީ ހަމައެކަނި މަދަނީ ހަރަކާތެއް ނޫނެވެ. އެއީ އަޚްލާގީ ޒިންމާއެކެވެ. އަދި އަމާނާތެކެވެ. އެހެންކަމުން، ވޯޓު ވިއްކުމަކީ ކުޑަ ކުށެއް ނޫނެވެ. އެއީ އިސްލާމީ އުސޫލުތަކާ ޚިލާފުވުން ހިމެނޭ ބޮޑު ފާފައެކެވެ.
ވޯޓު އަމާނާތަކަށް ވަނީ، މުޖުތަމައަށް އެންމެ ރަނގަޅު، އަދުލުވެރި އަދި ފައިދާހުރި ގޮތް އިޚްތިޔާރުކުރުމުގެ މަސްއޫލިއްޔަތު އޭގައި އެކުލެވިގެންވާތީއެވެ. އަމާނާތްތައް އަދާކުރުމަށާއި، ނިންމުންތަކުގައި ތެދުވެރިވުމަށް ﷲ ތައާލާ މުއުމިނުންނަށް އަމުރުކުރައްވާފައިވެއެވެ. ވޯޓަކީ ނިންމުމެއް ނުވަތަ ހުކުމެއް ފަދަ އެއްޗެކެވެ. އެއީ ވެރިކަމުގެ މަސްއޫލިއްޔަތާ އެންމެ އެކަށީގެންވަނީ ކާކުތޯ ނިންމާ ނިންމުމެވެ. ވޯޓު ވިއްކުމުގެ މާނައަކީ ތިމާއާ ހަވާލުކުރެވުނު އަމާނާތަށް ޚިޔާނާތްތެރިވުމެވެ. އަދި ހައްގު ގޮތާއި އަދުލުވެރިކަމުގެ މައްޗަށް އަމިއްލަ އެދުން އިސްކުރުމެވެ. މީގެ ސަބަބުން މަތިވެރި މަސްއޫލިއްޔަތެއް، ނުބައި މުއާމަލާތަކަށް ބަދަލުވެގެންދެއެވެ.
މީގެ އިތުރުން، ވޯޓު ވިއްކުމަކީ ރިޝްވަތުގެ ތެރޭގައި ހިމެނޭ ކަމެކެވެ. އިސްލާމްދީނުގައި ރިޝްވަތަކީ ހަރާމްކުރައްވާފައިވާ ކަމެކެވެ. ރަސޫލާ (ﷺ) ވަނީ ރިޝްވަތު ދޭ މީހާއާއި ރިޝްވަތުގައި ހިފާ މީހާއަށް ލައުނަތް ލައްވާފައެވެ. ވޯޓަށް ނުފޫޒު ފޯރުވުމަށް ފައިސާ ނުވަތަ މަންފާއެއް ބަދަލުކުރެވޭ ހިނދު، އެ ނިންމުމަކީ ހައްގު ގޮތުގެ މައްޗަށް ބިނާވެފައިވާ ނިންމުމަކަށް ނުވެއެވެ. އެއީ "ހަދިޔާ" އެއްގެ ނަމުގައި ނުވަތަ "އެހީ" އެއްގެ ނަމުގައި ދިން އެއްޗެއް ކަމުގައި ވިޔަސް، އޭގެ ސަބަބުން ވޯޓަށް އަސަރުކުރާނަމަ އެއީ ހަރާމް އެއްޗެކެވެ.
ވޯޓަކީ ހެކިބަސް ދިނުމުގެ ބާވަތެއްވެސް މެއެވެ. ތެދު ހެކިބަސް ދިނުމުގެ މުހިންމުކަން އިސްލާމްދީނުގައި ވަރަށް ބޮޑަށް ބަޔާންކޮށްފައިވެއެވެ. ވޯޓު ވިއްކާލުމުން، ވޯޓުލާ މީހާ އެ މަގާމަށް އެކަށީގެންނުވާ މީހަކަށް ތާއީދުކޮށް، އެއަށްވުރެ ބޮޑަށް އެކަށީގެންވާ މީހާ ދޫކޮށްލައެވެ. މިއީ ދޮގު ހެކިބަސް ދިނުމުގެ ތެރޭގައި ހިމެނޭ ކަމެކެވެ. އަދި ދޮގު ހެކިބަސް ދިނުމަކީ އިސްލާމްދީނުގައި ބޮޑެތި ފާފަތަކުގެ ތެރޭގައި ހިމެނޭ ކަމެކެވެ.
ވޯޓު ވިއްކުމުގެ ނަތީޖާ
- ފާފަވެރިވުމާއި މާތް ﷲގެ ކުރިފުޅުމަތީގައި ޖަވާބުދާރީވާންޖެހުން: އިންސާނާ ކުރާ ކޮންމެ އަމަލެއްވެސް ދަނީ ރެކޯޑު ކުރެވެމުންނެވެ. ވޯޓު ވިއްކުމަކީ މާތް ﷲއަށް ސިއްރުވާނޭ ކަމެއް ނޫނެވެ. ގިޔާމަތް ދުވަހުން އެކަމާ ބެހޭގޮތުން ސުވާލު ކުރެވޭނެއެވެ.
- އަނިޔާވެރިކަމާއި، ނާއިންސާފު ފެތުރުން: ގާބިލުކަމަށް ބެލުމުގެ ބަދަލުގައި ފައިސާ ބޭނުންކޮށްގެން ވެރިން ހޮވުމުން، މުޖުތަމައުގައި އަނިޔާވެރިކަން ފެތުރެއެވެ. އަނިޔާވެރިކަމަށް މަގުފަހިވާ ކޮންމެ ކަމަކާ އިސްލާމްދީން ދެކޮޅުހަދައެވެ.
- ބަރަކާތް ކެނޑުން: ހަރާމް ގޮތުގައި ހޯދާ ފައިސާއަކީ އޭގައި ބަރަކާތް ހުންނާނެ އެއްޗެއް ނޫނެވެ. ވަގުތީ ގޮތުން އޭގެ ފައިދާ ފެނުނު ކަމުގައި ވިޔަސް، އޭގެ ނަތީޖާއަކީ ރޫހާނީ ގޮތުން ގެއްލުންވެ ހިތާމަކުރަން ޖެހުމެވެ.
- މުޖުތަމައު ފަސާދަވުން: އިސްލާމްދީނުގެ މަގްސަދަކީ އަދުލުވެރި، އަޚްލާގީ މުޖުތަމައެއް ބިނާކުރުމެވެ. ވޯޓު ވިއްކުމަކީ މި ބިންގާ ބަލިކަށިކޮށް، ކޮރަޕްޝަން ނުވަތަ ފަސާދައަށް ފުރުސަތު ހުޅުވިގެންދާ ކަމެކެވެ.
އަމިއްލަ އެދުމަށްވުރެ ތެދުވެރިކަން އިސްކުރުމަކީ އީމާންކަމާއި ތަގުވާވެރިކަމުގެ ތެރެއިންވާ ކަމެކެވެ. ތެދުވެރި މުއުމިނަކު ވޯޓުލާނީ އިޚްލާސްތެރިކަމާއެކުގައެވެ. ﷲ ތައާލާ އަބަދުވެސް އަހަރެމެންގެ އަމަލުތައް ބައްލަވާވޮޑިގެންވާކަން ހަނދާންކޮށް، މުޖުތަމައަށް އެންމެ ފައިދާހުރި އަދުލުވެރި ގޮތް އިޚްތިޔާރުކޮށްގެންނެވެ.
ވޯޓު ވިއްކުމަކީ ވަގުތީ ފައިދާއެއް ލިބޭ ކުޑަ ކަމެއްގެ ގޮތުގައި ފެނުނު ކަމުގައި ވިޔަސް، އޭގެ ނަތީޖާ ދީނީ ގޮތުންނާއި، އަޚްލާގީ ގޮތުން އަދި އިޖުތިމާއީ ގޮތުންވެސް ވަރަށް ނުރައްކާތެރިއެވެ. އިސްލާމްދީނުގައި އިއްޒަތްވަނީ ވަގުތީ މަންފާއަކު ނޫނެވެ، އަމާނާތްތެރިކަމުގައެވެ. ވޯޓަކީ އަމާނާތެކެވެ. އެއީ ދުވަހަކުވެސް ވިއްކާލައިގެންވާނެ އެއްޗެއް ނޫނެވެ.
