މަޓީގެ ޗެއާޕާސަންގެ މަގާމު ހުސްވީ އެ މަގާމުގައި ގިނަ އަހަރުތަކެއް ވަންދެން ހުންނެވި މުހައްމަދު އުމަރު މަނިކު (އެމްޔޫ މަނިކު) މިދިޔަ އަހަރުގެ އޮގަސްޓް މަހު އަވަހާރަވުމާ ގުޅިގެންނެވެ. ޗަމްޕާ ރިސޯޓްސްގެ ހިއްސާދާރު، އަފީފަކީ މީގެ ކުރިން ވެސް މަޓީގެ އިސް މަގާމުތަކެއް ފުރުއްވާފައިވާ، ފަތުރުވެރިކަމުގެ ދާއިރާގައި ތަޖުރިބާކާރު ބޭފުޅެކެވެ.
މަގާމާ ހަވާލުވެވަޑައިގަތުމަށްފަހު އަފީފް ވިދާޅުވީ، ވޭތުވެދިޔަ އަހަރުތަކުގައި ރާއްޖޭގެ ޓޫރިޒަމް ކުރިއެރުވުމަށް މަޓީން ވަރަށް މުހިންމު ދައުރެއް އަދާކޮށްފައިވާ ކަމަށެވެ. އަދި ކުރިއަށް އޮތް ތަނުގައި ވެސް ދާއިރާގެ ކުރިއެރުމަށް ގިނަ މަސައްކަތްތަކެއް ކުރުމަށް ނިންމާފައިވާ ކަމަށް އޭނާ ފާހަގަކުރެއްވިއެވެ.
ރާއްޖޭގެ ރިސޯޓްތައް ތަމްސީލުކުރާ މައި ޖަމިއްޔާގެ ގޮތުގައި ހަރަކާތްތެރިވާ މަޓީގައި 100 އަށް ވުރެ ގިނަ ރިސޯޓު ހިމެނެއެވެ. މި ޖަމިއްޔާއަކީ ރާއްޖޭގެ އިގްތިސާދުގެ މައި ތަނބު ކަމަށްވާ ފަތުރުވެރިކަމުގެ ސިނާއަތުގެ ސިޔާސަތުތައް ކަނޑައެޅުމާއި ދާއިރާ ކުރިއެރުވުމުގައި ސަރުކާރާއެކު ގާތުން މަސައްކަތްކުރާ މުހިންމު ޖަމިއްޔާއެކެވެ.
