ދައުލަތުގެ ޚަރަދުތައް ހަމަޖެއްސުމަށްޓަކައި، ސަރުކާރުން 4.27 ބިލިއަން ރުފިޔާގެ ޓީބިލް ވިއްކުމަށް ފުރުޞަތު ހުޅުވާލައިފިއެވެ.
މިނިސްޓްރީ އޮފް ފިނޭންސްއިން މިއަދު ނެރުނު އިޢުލާނެއްގައި ބަޔާންކޮށްފައިވާ ގޮތުގައި، މިފަހަރު ވިއްކުމަށް ހަމަޖެހިފައިވަނީ ހަތަރު ބާވަތެއްގެ ޓީބިލެވެ.
މި ހަތަރު ބާވަތުގެ ޓީބިލްތަކަކީ އެއް މަސް، ތިން މަސް، ހަ މަސް އަދި އެއް އަހަރުގެ މުއްދަތުގައި އަނބުރާ ދައްކަންޖެހޭ ބިލްތަކެކެވެ. އޭގެ ތެރޭގައި ހިމެނެނީ:
1. އެއް މަހުގެ ބިލް: 1.97 ބިލިއަން ރުފިޔާ (3.50% އިންޓަރެސްޓް ރޭޓްގައި)
2. ތިން މަހުގެ ބިލް: 172 މިލިއަން ރުފިޔާ (3.87% އިންޓަރެސްޓް ރޭޓްގައި)
3. ހަ މަހުގެ ބިލް: 830 މިލިއަން ރުފިޔާ (4.23% އިންޓަރެސްޓް ރޭޓްގައި)
4. އެއް އަހަރުގެ ބިލް: 1.29 ބިލިއަން ރުފިޔާ (4.60% އިންޓަރެސްޓް ރޭޓްގައި)
މި ބިލްތައް ގަތުމަށް ޝައުޤުވެރިވާ ފަރާތްތަކުން އަންނަ ހޯމަ ދުވަހުގެ ކުރިން ބިލަށްވާ ފައިސާ ދެއްކުމަށް ފިނޭންސް މިނިސްޓްރީން އަންގާފައިވެއެވެ.
މިއީ މި އަހަރު ތެރޭގައި ސަރުކާރުން ޓީބިލް ވިއްކުމަށް ކުރާ ފުރަތަމަ އިޢުލާނެއް ނޫނެވެ. މީގެ ކުރިން، އޮގަސްޓު މަހު ވެސް 1.9 ބިލިއަން ރުފިޔާގެ ޓީބިލު ވިއްކާފައިވެއެވެ.
ޓީބިލަކީ ސަރުކާރުން އިންޓަރެސްޓާއެކު އަނބުރާ ދައްކާ ގޮތަށް ނަގާ ދަރަންޏެކެވެ. މި ބިލްތައް ގަންނަނީ ގިނަ ފަހަރު ރާއްޖޭގެ ބޭންކުތަކާއި، ޕެންޝަން އޮފީހާއި، ސަރުކާރުގެ ކުންފުނިތަކާއި އަދި ބައެއް އަމިއްލަ ވިޔަފާރިތަކުންނެވެ.
ފިނޭންސް މިނިސްޓްރީގެ ތަފާސްހިސާބުތަކުން ދައްކާ ގޮތުގައި، މިހާތަނަށް ސަރުކާރުން ވިއްކާފައިވާ ޓީބިލްތަކުގެ ތެރެއިން އަނބުރާ ނުދައްކާ 85.3 ބިލިއަން ރުފިޔާ އޮތް ކަމަށް ވެއެވެ.
ދައުލަތުގެ ދަރަނި އިތުރުވެ، ބޭރު ފައިސާގެ ރިޒާވް ދަށްވަމުންދާ މި ދަނޑިވަޅުގައި، ސަރުކާރުން ވަނީ އާމްދަނީ އިތުރުކުރުމަށާއި ޚަރަދުތައް ކުޑަކުރުމަށް އެކި ފިޔަވަޅުތައް އަޅަމުންދާ ކަމަށް ބުނެފައެވެ. މީގެ ތެރޭގައި ސިޔާސީ މަޤާމުތަކުގެ އަދަދު މަދުކުރުމާއި، ބައެއް ޓެކްސްތައް އިތުރުކުރުން ހިމެނެއެވެ.
ސަރުކާރުން މިހާރު ވަނީ ދަރަނި އަދާކުރުމަށް އިސްކަންދޭނެ ކަމަށާއި، ކްރެޑިޓަރުންނާއި އިންވެސްޓަރުންނަށް ދަރަނި އަދާކުރާނެކަމުގެ ޔަގީންކަން ދޭނެ ކަމަށް ބުނެފައެވެ. މި ކަން ކަށަވަރު ކޮށްދިނުމުގެ ގޮތުން، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ވެސް ވަނީ ދަރަނި ދެއްކޭނެ ކަމުގެ ގެ ޔަގީންކަން ދީފައެވެ.
އެހެންނަމަވެސް، މި އަހަރު ތެެރޭގައި މޫޑީސްއާއި ފިޗް ފަދަ ބައިނަލްއަޤްވާމީ ކްރެޑިޓް ރޭޓިންގ އޭޖެންސީތަކުން ވަނީ ދިވެހިރާއްޖޭގެ ކްރެޑިޓް ރޭޓިންގ ދަށްކޮށްފައެވެ. މިއީ ރާއްޖޭގެ އިިޤްތިޞާދީ ހާލަތާ މެދު ކަންބޮޑުވުން އުފެދިފައިވާކަން ދައްކުވައިދޭ ކަމެކެވެ.
މި ޓީބިލްތައް ވިއްކުމަކީ ސަރުކާރުން ދައުލަތުގެ ޚަރަދުތައް ފޫބެއްދުމަށާއި، އިޤްތިޞާދީ ގޮންޖެހުންތަކާ ކުރިމަތިލުމަށް އަޅަމުންދާ ފިޔަވަޅުތަކުގެ ތެރެއިން އެއް ފިޔަވަޅު ކަމުގައި ބެލެވެއެވެ. ނަމަވެސް، ދަރަނި އިތުރުވަމުންދާ މިންވަރާމެދު ގިނަ ފަރާތްތަކުންން ކަންބޮޑުވުން ފާޅުކުރަމުންދާކަން ފާހަގަކުރެވެއެވެ.
