ރާއްޖޭގެ އެކި ކަންކޮޅުތަކުގައި 61 ޕޮލިސް ސްޓޭޝަނެއް ތަރައްގީ ކުރަން އިންޑިއާގެ ކުންފުންޏަކާ ހަވާލުކުރި 3.6 މިލިއަން ޑޮލަރު ވީނުވީއެއް ނޭނގި ގެއްލިފައިވާ ކަމަށް ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާން ވިދާޅުވެއްޖެ އެވެ.
މިނިސްޓަރު ވިދާޅުވީ ގެއްލުނު ފައިސާގެ މައްސަލަ މޯލްޑިވްސް ޕޮލިސް ސަރވިސްއަށް ހުށަހަޅާފައިވާ ކަމަށެވެ.
އަންގާރަ ދުވަހު އެ މިނިސްޓްރީން ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ އިންޑިއާގެ ކުންފުންޏެއް ކަމަށްވާ އިންދިރާ ޕްރޮޖެކްޓްސް އިން 41.18 މިލިއަން ޑޮލަރުގެ މި މަޝްރޫއު ތަރައްގީ ކުރަން ޝައުގުވެރިކަން ފާޅުކުރީ މިދިޔަ އަހަރުގެ އޮގަސްޓް މަހު ކަމަށެވެ.
ކުރީގެ ސަރުކާރުން ކޮންޓްރެކްޓަރުގެ ބިޑް ބަލައިގަތް އިރު، އެ ކުންފުނިން ޝަރުތުކުރި ގޮތުގައި މަޝްރޫއުގެ 85 ޕަސެންޓް ފައިނޭންސް ކުރާނީ އިންޑިއާގެ އެގްޒިމް ބޭންކް މެދުވެރިކޮށެވެ. ބާކީ 15 އިންސައްތަ ފައިނޭންސް ކުރާނީ ދިވެހި ސަރުކާރުންނެވެ.
އިހުސާން ވިދާޅުވީ ކަރުދާސް ޓްރެއިލް ކުރި ނަމަވެސް އެއްވެސް ޕޮލިސް ސްޓޭޝަނެއްގެ އަމަލީ މަސައްކަތެއް ފަށާފައި ނުވާ ކަމަށެވެ. އޭނާ ވިދާޅުވީ 2023 ވަނަ އަހަރުގެ އޭޕްރީލް މަހު އިންދިރާ ޕްރޮޖެކްޓްސް އިން އެ ޕްރޮޖެކްޓަށް ފައިނޭންސް ކުރަން އެގްޒިމް ބޭންކުން ދެކޮޅު ހެދި ކަން ދިވެހި ސަރުކާރަށް އަންގާފައިވާ ކަމަށެވެ.
އޭގެ ފަހުން ދެ ފަރާތުގެ މެދުގައި މުއާމަލާތްތައް ހިނގަމުން ދިޔަ ނަމަވެސް، އެ ފައިސާ މިހާރު ފެނިފައެއް ނުވެ އެވެ. އިންދިރާ ޕްރޮޖެކްޓްސްގެ ޖޮއިންޓް ވެންޗާ އުވާލިކަން 2024 ވަނަ އަހަރުގެ ޖެނުއަރީ މަހު ވަނީ މި ސަރުކާރަށް އަންގާފަ އެވެ.
މިނިސްޓަރު އިތުރަށް ވިދާޅުވީ މި މަޝްރޫއަށް ފަސް މިލިއަން ޑޮލަރުގެ ހިލޭ އެހީއެއް ދިނުމަށް ކޮންޓްރެކްޓަރު މީގެ ކުރިން ވައުދުވި ނަމަވެސް ފަހުން އެކަމާ ގުޅޭ ގޮތުން އެއްވެސް މަޝްވަރާއެއް ކޮށްފައި ނުވާ ކަމަށެވެ.
"މިހާތަނަށް ކޮމިއުނިކޭޝަން ފޯކަލް ޕޮއިންޓް ނުވަތަ ކުންފުނީގެ ލޮކޭޝަން ގާއިމުކުރުމުގައި ވެސް އަދި ޕްރޮޖެކްޓާ އެކު ކުރިއަށް ދާނެ އިޖުރާއަތެއް ވެސް އަޅުގަނޑަކަށް ކާމިޔާބެއް ނުލިބޭ،" އިހުސާން ވިދާޅުވި އެވެ.
މިނިސްޓަރު އިހުސާން ވިދާޅުވީ މިމައްސަލަ އަކީ ރާއްޖޭގެ ބައެއް ރަށްރަށާއި އެ ރަށްރަށުގެ ކައުންސިލް އިދާރާތަކުން ކަންބޮޑުވާ ކަމެއްގެ ގޮތުގައި ފާހަގަކުރެވިފައިވާ ކަމަށެވެ. މުހައްމަދު މުއިއްޒު ދާދި ފަހުން އަތޮޅުތަކަށް ކުރައްވަމުން ގެންދަވާ ދަތުރުފުޅުތަކުގައި ޕޮލިސް ސްޓޭޝަންތަކާ ބެހޭ ގޮތުން މިހާރުވެސް ސުވާލުއުފެއްދަވަމުން ގެންދަވާ ކަން އޭނާ ފާހަގަކުރެއްވި އެވެ.
