އިންތިހާބުތަކާ ބެހޭ އާންމު ގާނޫނަށް އިސްލާހު ގެނައުމުގެ ބިލު ރައީސް ޑރ.މުހައްމަދު މުއިއްޒު ތަސްދީގު ކުރެއްވުމާ ގުޅިގެން ފަސްކުރި ރައްޔިތުންގެ މަޖިލީހުގެ އިންތިހާބު އަންނަ އޭޕްރީލް މަހުގެ 21 ވަނަ ދުވަހު ބޭއްވުމަށް އިލެކްޝަންސް ކޮމިޝަން (އީސީ) އިން ރޭ ނިންމައިފި އެވެ.
ރައްޔިތުންގެ މަޖިލީހުގެ އިންތިހާބު އެންމެ ފުރަތަމަ ބާއްވަން ނިންމާފައި އޮތީ މި މަހުގެ 17 ވަނަ ދުވަހު އެވެ.
ރަމަޟާން މަހު އިންތިހާބު ބޭއްވުން މަނާކުރާ ބިލު ރައީސް މުއިއްޒު ތަސްދީގު ކުރެއްވީ ބަންޑާރަ ނައިބުގެ ލަފާގެ މަތިންނެވެ. މި ބިލް ތަސްދީގު ކުރުމުގެ މާނައަކީ އިންތިހާބު ބޭއްވޭނީ ރަމަޟާން މަސް ނިމޭތާ 10 ދުވަސް ފަހުންނެވެ.
މި ބިލު މަޖިލީހުން އެންމެ ފުރަތަމަ ފާސްކުރީ ފެބްރުއަރީ މަހުގެ 11 ވަނަ ދުވަހުއެވެ. ނަމަވެސް އޭގެ ދެ ހަފުތާ ފަހުން ފާސްކުރި ބިލް ތަސްދީގު ނުކުރައްވައި ރައީސް ފޮނުވާލައްވާފައެވެ.
ބުދަ ދުވަހުގެ މެންދުރުފަހު އަނެއްކާވެސް އެ ބިލު ވަނީ ފާސްކޮށްފައެވެ.
ގާނޫނު އަސާސީ ބުނާގޮތުން އެއްވެސް އިސްލާހެއް ނެތި ދެވަނަ ފަހަރަށް ރައީސުލްޖުމްހޫރިއްޔާ ބޭރުކޮށްލާ ބިލެއް މަޖިލީހުން ފާސްކޮށްފިނަމަ އަދި ގާނޫނު ހަދާ މަޖިލީހުގެ ސާފު އަޣުލަބިއްޔަތާއެކު ގާނޫނު ހަދާ މަޖިލިސް ތަސްދީގު ކުރަން ރައީސަށް މަޖުބޫރުވެ އެވެ.
