އިސްރާއީލުން ފަލަސްތީނުގެ ޣައްޒާއަށް ރޭ ދިން ހަމަލާތަކުގައި އެކަނިވެސް ގިނަ އަދަދެއްގެ ކުޑަކުދިންތަކެއް ޝަހީދުވެއްޖެ އެވެ.
އެގޮތުން ރޭގައި އިސްރާއިލުން ވަނީ ޢައްޒާގެ އާންމުން ދިރިއުޅޭ ގެއަކަށް ހަމަލާދީފަ އެވެ. މި ހަމަލާތަކުގައި 17 އާއި ގާތްކުރާ ވަރަށް މީހުން ޝަހީދުވެފައިވާކަމަށް ފަލަސްތީނުގެ ނިއުސް އެޖެންސީ، ވާފާއިން ރިޕޯޓްކޮށްފައި ވެއެވެ.
މި ހަމަލާތަކުގައި ޝަހީދުވި މީހުންގެ ތެރޭގައި ގިނައީ ކުޑަކުދިންކަމަށްވެސް މި ވާފާއިން ހާމަކޮށްފައިވެއެވެ. އަދި އެތައް ބަޔަކު ޒަހަމްވެފައިވާ ކަމަށް ރިޕޯޓުތައް ބުނެއެވެ.
އިއްޔެ އާ ހަމައަށް ޣައްޒާއިން ޝަހީދުވި އަދަދު 6،000 އަށްވުރެ މައްޗަށް ވަނީ އަރައިފައެވެ. އަދި ޒަހަމްވި މީހުންގެ އަދަދު 15،000 އަށްވުރެ ވަނީ މަތިވެފައެވެ.
މިހާރު އިސްރާއީލުން ނިންމާފައި ވަނީ ޣައްޒާއަށް ވަރުގަދަ ހަމަލާތަކެއް ދިނުމަށެވެ. އެކަމަށް ތައްޔާރީތައްވެސް ވަނީ ވެފައެވެ.
