ސަރުކާރު ހިއްސާވާ ބައެއް ކުންފުނިތަކުގެ މުވައްޒަފުން ވަކި ކުލައެއްގެ ގަލަމަކުން ވޯޓު ކަރުދާހުގައި ފާހަގަޖެހުމަށް މަޖުބޫރުކޮށް ވޯޓުގެ ސިއްރުކަން ގެއްލުވާލުމަށް މަސައްކަތް ކުރަމުންދާ ކަމަށް ބުނެ މޯލްޑިވްސް ނެޝަނަލް ޕާޓީ (އެމްއެންޕީ) އިން އިލެކްޝަންސް ކޮމިޝަނަށް ޝަކުވާ ހުށަހަޅައިފި އެވެ.
އިންތިހާބަށް ބާކީ 10 ދުވަސް އޮތް އިރު، އެ ޕާޓީން އީސީ އަށް ފޮނުވި ސިޓީއެއްގައި ބުނީ، އިންތިހާބުގައި ވާދަކުރާ ބައެއް ކެންޑިޑޭޓުންގެ ކެމްޕޭނުގައި ދައުލަތުގެ ވަސީލަތްތައް ނަހަމަ ގޮތުގައި ބޭނުންކުރަމުންދާ ކަމަށެވެ.
އަންނަ މަހުގެ 9 ގައި ލާ ވޯޓުގެ ސިއްރުކަން ގެއްލޭ ފަދަ އަމަލުތައް ސަރުކާރުގެ ކުންފުނިތައް މެދުވެރިވެގެން ކުރަން އުޅޭ ކަމުގެ ޝަކުވާ އެ ޕާޓީ އަށް ލިބިފައިވާ ކުރީގެ ޑިފެންސް މިނިސްޓަރު މުހައްމަދު ނާޒިމްގެ އެމްއެންޕީން ބުންޏެވެ.
"ކުންފުނިތަކުގެ އިސްވެރިން އެދޭ ގޮތަށް ވަކި ކުލައެއްގެ މާކަރެއް ނުވަތަ ގަލަމަކުން ވޯޓު ކަރުދާހުގައި ފާހަގަޖެހުމަށް އެ ކުންފުނިތަކުގެ މުވައްޒިފުންނަށް މަޖުބޫރު ކުރަމުންދާ ކަމުގެ ޝަކުވާ އެ ކުންފުނިތަކުގެ މުވައްޒަފުން އަންނަނީ ކުރަމުންނެވެ." އެމްއެންޕީގެ ނައިބް ރައީސް އަދި އެ ޕާޓީގެ ރިޔާސީ ކެންޑިޑޭޓުގެ އެޖެންޓް އަހްމަދު އުޝާމު ސޮއި ކުރައްވާފައިވާ ސިޓީގައިވެ އެވެ.
މިއީ އެމްއެންޕީން ބުނި ގޮތުގައި ގާނޫނުއަސާސީގައި ބަޔާންކޮށްފައިވާ ގޮތަށް ވޯޓުގެ ސިއްރުކަން ގެއްލިދާނެ ފަދަ އަމަލެކެވެ. އެހެންވެ، މިއީ ނުރަނގަޅު ނުފޫޒެއް ނެތި، މިނިވަން އަދި އިންސާފުވެރި އިންތިހާބެއް ކަން ކަށަވަރުކުރުމަށްޓަކައި، މި ކަންކަމާ މެދު މަޝްވަރާކުރަން ގައުމީ ލަފާ ދޭ ކޮމިޓީގެ ބައްދަލުވުމެއް ބާއްވައި ދިނުމަށް އެމްއެންޕީން ވަނީ އީސީގެ ކިބައިން އެދިފައި އެވެ.
