ތެލް އަވީވަށް ދަތުރުކުރި ފްލައި ދުބާއީގެ ފްލައިޓެއްގައި ހިނގި ހާދިސާއަކާ ގުޅިގެން، ދެ ދިވެއްސަކު ދުބާއީން ހިފަހައްޓާފައިވާ ކަމަށް ރިޕޯޓުތައް ބުނެފިއެވެ.
ސަރުކާރުގެ ތަރުޖަމާނު މުހައްމަދު ހުސައިން ޝަރީފާ ހަވާލާދީ ރާއްޖޭގެ މީޑިއާތަކުން ރިޕޯޓުކޮށްފައިވާ ގޮތުގައި، އެ ދެ މީހުން ދުބާއީން ހިފަހައްޓާފައިވަނީ ރޭގެ ވަގުތެއްގައެވެ. ނަމަވެސް، އެ ހާދިސާއާ އެ ދެ މީހުންނާ އޮތް ގުޅުމެއް އަދި އެ މީހުން ހިފެހެއްޓި ސީދާ ސަބަބު އަދި ކަށަވަރުވެފައި ނުވާ ކަމަށް ތަރުޖަމާނު ވަނީ ވިދާޅުވެފައެވެ.
މައުލޫމާތު ލިބިފައިވާ ގޮތުގައި މި ދެ ދިވެހިން ދިރިއުޅެމުންދިޔައީ ފްލައި ދުބާއީގެ ޕައިލެޓުން ދިރިއުޅޭ އިމާރާތެއްގައެވެ. އަދި އެ މީހުން ހިފަހައްޓާފައިވަނީ އެ އިމާރާތުގައި ތިބި އެހެން ބަޔަކާ ވެސް އެކުގައެވެ.
މި ހާދިސާ ހިނގާފައިވަނީ 174 ފަސިންޖަރުންނާއި 8 ފަޅުވެރިންނާއެކު ދަތުރުކުރަމުންދިޔަ ފްލައި ދުބާއީގެ މަތިންދާބޯޓެއްގައެވެ. އެގޮތުން، ދަތުރުމަތީގައި ކޯ-ޕައިލެޓު ވަނީ ކެޕްޓަނަށް ހަމަލާދީފައި ކަމަށް ތުހުމަތުކުރެވެއެވެ. ޔޫއޭއީން ވަނީ މި ހާދިސާއަކީ ޓެރަރިޒަމްގެ އަމަލެއްގެ ގޮތުގައި ސިފަކޮށްފައެވެ.
މި ހާދިސާއާ ގުޅިގެން އެ މަތިންދާބޯޓުގެ މިސްރާބު ބަދަލުކޮށް، ސައޫދީ އަރަބިއްޔާއަށް ސަލާމަތްތެރިކަމާއެކު ވަނީ ޖައްސާފައެވެ. މި މައްސަލަ ކަމާބެހޭ އިދާރާތަކުން މިހާރު ދަނީ ތަހުގީގު ކުރަމުންނެވެ.
