ދެކުނު އަރިއަތޮޅު މެރިން ޕްރޮޓެކްޓެޑް އޭރިއާ (ސަމްޕާ) ސަރަހައްދުގެ މެނޭޖްމަންޓް ޕްލޭނާ އެއްގޮތްވާ ގޮތުގެ މަތިން، 30 ޖޫން 2026 ގެ ކުރިން އެ ސަރަހައްދުގައި ދުއްވާ އުޅަނދުފަހަރުގެ ބުރަފަތިތަކުގައި ޕްރޮޕެލާ ގާޑް ހަރުކުރަންޖެހޭނެކަން މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީން އުޅަނދު ދުއްވާ ފަރާތްތަކަށް ހަނދާންކޮށްދީފިއެވެ.
މިނިސްޓްރީން ހާމަކުރި ގޮތުގައި، ޕްރޮޕެލާ ގާޑް ހަރުކުރަން މަޖުބޫރުކުރީ އެ ސަރަހައްދުގައި ދިރިއުޅޭ ކަނޑުގެ ދިރުންތަކަށާއި، މޫދުގައި ހަރަކާތްތެރިވާ މީހުންގެ ސަލާމަތާއި ރައްކާތެރިކަން އިތުރުކުރުމަށެވެ. ސަމްޕާ ސަރަހައްދަކީ މުޅި އަހަރު ދުވަހު ވޭލްޝާކް ފެންނަ، ބައިނަލްއަގުވާމީ ގޮތުން މަޝްހޫރު ސަރަހައްދެކެވެ.
މިނިސްޓްރީން ފާހަގަކުރި ގޮތުގައި ޕްރޮޕެލާ ގާޑް ބޭނުންކުރުމުގެ މައިގަނޑު ދެ ބޭނުމެއްވެއެވެ. ފުރަތަމަ ކަމަކީ، އުޅަނދުގެ ބުރަފަތި ހިލައެއް ފަދަ ހަރު އެއްޗެއްގައި ޖެހިއްޖެ ނަމަ، ބުރަފައްޗަށާއި ގިއަރބޮކްސްއަށް ލިބޭ ގެއްލުންތަކުން ސަލާމަތްވުމެވެ. ދެވަނަ ކަމަކީ، އެނބުރެމުންދާ ބުރަފައްޗެއްގައި ޖެހިގެން ވޭލްޝާކަކަށް ނުވަތަ އިންސާނަކަށް ލިބިދާނެ ނުރައްކާތެރި އަނިޔާތަކުގެ ފުރުސަތު ކުޑަކުރުމެވެ.
ނަމަވެސް، ހަމައެކަނި ޕްރޮޕެލާ ގާޑް ހަރުކުރުމަކީ މިފަދަ ހާދިސާތައް މުޅިން ހުއްޓުވޭނެ ކަމެއް ނޫންކަން ކަމާބެހޭ ފަރާތްތަކުން ވަނީ ފާހަގަކޮށްފައެވެ. މިފަދަ އަނިޔާތަކުން ރައްކާތެރިވުމަށް އޮތް އެންމެ ފައިދާހުރި ގޮތަކީ، އުޅަނދުތައް ދުއްވާއިރު އިންސާނުންނާއި ކަނޑުގެ ދިރުންތައް ބުރަފައްޗާ ދުރުގައި ބޭތިއްބުން ކަމަށް މިނިސްޓްރީން ނަސޭހަތްތެރިވެއެވެ.
ސަލާމަތީ ކަންކަން އިތުރަށް ހަރުދަނާކުރުމަށްޓަކައި، އުޅަނދުފަހަރު ދުއްވާ ފަރާތްތަކުންނާއި ފަޅުވެރިން ތިރީގައިވާ މުހިންމު އުސޫލުތަކަށް އަމަލުކުރުމަށް މިނިސްޓްރީން ވަނީ އިލްތިމާސްކޮށްފައެވެ:
- ހުރިހާ ވަގުތެއްގައިވެސް ކަނޑުގެ ސަރަހައްދަށް ރަނގަޅަށް ބަލައި ފާރަވެރިވުން.
- އިންޖީނު އިސްޓާޓުކުރުމުގެ ކުރިން، ބުރަފަތީގެ ކައިރީގައި އެއްވެސް ނުރައްކަލެއް ނުވަތަ ހުރަހެއް އޮތްތޯ ޗެކްކުރުން.
- އިންޖީނު ހިނގާފައި ހުންނަ ކޮންމެ ވަގުތެއްގައި 'ކިލް ކޯޑް' ބޭނުންކުރުން.
- މޫދުގައި އުޅޭ މީހަކު ބުރަފަތީގައި ޖެހިދާނެ ފަދަ ނުރައްކަލެއް ކުރިމަތިވެއްޖެ ނަމަ، ވަގުތުން އިންޖީނު ނިއްވާލުން.
- އުޅަނދުން މޫދަށް ވެއްޓުމުން ކުރިމަތިވެދާނެ ނުރައްކާތަކާ ބެހޭގޮތުން ފަސިންޖަރުންނަށް މައުލޫމާތުދީ ހޭލުންތެރިކުރުވުން.
- ސަމްޕާ މެނޭޖްމަންޓް ޕްލޭންގައި ކަނޑައަޅާފައިވާ ދުވެލީގެ މިންގަނޑުތަކަށާއި ދުރުމިން ހިފެހެއްޓުމުގެ އުސޫލުތަކަށް ފުރިހަމައަށް ބޯލަނބުން.
މިނިސްޓްރީން ފާހަގަކުރި ގޮތުގައި، ހާދިސާތަކުން ރައްކާތެރިވުމަށް އޮތް އެންމެ ފައިދާހުރި ގޮތަކީ ކުރިއާލައި ރައްކާތެރިކަމުގެ ފިޔަވަޅު އެޅުމެވެ. އަދި ކޮންމެ އަހަރަކު އެތައް ހާސް ފަތުރުވެރިންނެއް ދެކުނު އަރިއަތޮޅަށް ޒިޔާރަތްކުރާ މައިގަނޑު ސަބަބު ކަމުގައިވާ ވޭލްޝާކްތަކާއި، ޒިޔާރަތްކުރާ ފަރާތްތަކުގެ ސަލާމަތްތެރިކަން ކަށަވަރުކުރުމަށްޓަކައި، އުޅަނދުފަހަރު ދުއްވުމުގައި ޒިންމާދާރުވުން ކޮންމެހެން ބޭނުންތެރިކަމަށްވެސް މިނިސްޓްރީން ވިދާޅުވިއެވެ.
ބުރަފަތީގައި ޕްރޮޕެލާ ގާޑް ހަރުކުރުމަށް ކަނޑައަޅާފައިވާ މި މުހުލަތަކީ، ރާއްޖޭގެ އެންމެ މުހިންމު އެއް މެރިން ޕްރޮޓެކްޓެޑް އޭރިއާގައި ކަނޑުގެ ދިރުންތައް ހިމާޔަތްކުރުމުގެ ފިޔަވަޅުތައް ވަރުގަދަކުރުމަށާއި، ދެމެހެއްޓެނިވި ގޮތެއްގައި ފަތުރުވެރިކަން ކުރިއެރުވުމަށް ސަމްޕާ މެނޭޖްމަންޓް ޕްލޭންގެ ދަށުން ކުރަމުންދާ މަސައްކަތްތަކުގެ ތެރޭގައި ހިމެނޭ ކަމެކެވެ.
