އަމިއްލައަށް އެދިގެން ލޭ ހަދިޔާ ކުރުމަކީ އާންމު ސިއްހަތުގެ ރައްކާތެރިކަން ކަށަވަރުކުރުމަށް ކޮންމެހެން މުހިންމު ކަމެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ. ރައީސް މިހެން ވިދާޅުވީ ދުނިޔޭގެ ލޭހަދިޔާ ކުރާ މީހުންގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ.
ރައީސްގެ މެސެޖުގައި ވިދާޅުވީ، އަމިއްލައަށް އެދިގެން ލޭ ހަދިޔާކުރާ މީހުންގެ ސަބަބުން އެތައް ފުރާނައެއް ސަލާމަތްކުރެވޭ ކަމަށާއި، އެ ފަރާތްތަކުގެ ދީލަތި އެހީތެރިކަމުގެ ސަބަބުން ދާއިމީކޮށް ލޭ އަޅަންޖެހޭ މީހުންނާއި ކުއްލި ހާލަތުގައި ލޭ ބޭނުންވާ ބަލިމީހުންނަށް ވަގުތުން ފަރުވާ ދިނުމަށް މަގުފަހިވާ ކަމަށެވެ. އަދި ލެއަކީ ބޭސްވެރިކަމުގެ ޒަމާނީ ބަދަލުތަކާއެކުވެސް އޭގެ ބަދަލުގައި ބޭނުންކުރެވޭނެ އެހެން ވަސީލަތެއް ނެތް މުހިންމު އެއްޗެއްކަން އެމަނިކުފާނު ފާހަގަކުރެއްވިއެވެ.
On #WorldBloodDonorDay, we recognise the invaluable contribution of voluntary blood donors, whose generosity helps save lives. Their selfless act ensures that those suffering from lifelong conditions or patients requiring emergency care receive the support they need when it… pic.twitter.com/Bd9g13Giw2
— Dr Mohamed Muizzu (@MMuizzu) June 14, 2026
ރާއްޖެއަކީ ޖަޒީރާ ގައުމަކަށް ވުމުން، ބޭނުންވާ ވަގުތު ލޭ ލިބޭނެ އިންތިޒާމުތައް ހަމަޖެހިފައި ހުރުމަކީ ސިއްހީ ކުއްލި ހާލަތްތަކުގައި ނުހަނު ބޭނުންތެރި ކަމެއް ކަމަށް ރައީސް ވިދާޅުވިއެވެ. އެގޮތުން، މި ސަރުކާރުން އާންމުން ހޭލުންތެރިކޮށް، އަމިއްލައަށް ލޭ ހަދިޔާކުރުމަށް ބާރުއެޅުމަށާއި މުޖުތަމައުގެ ދުޅަހެޔޮކަމަށް ގުޅިގެން މަސައްކަތް ކުރަމުންދާނެ ކަމުގެ ޔަގީންކަން އެމަނިކުފާނު ދެއްވިއެވެ.
ކޮންމެ އަހަރެއްގެ ޖޫން މަހުގެ 14 ވަނަ ދުވަހަކީ ދުނިޔޭގެ ލޭ ހަދިޔާކުރާ މީހުންގެ ދުވަހުގެ ގޮތުގައި ފާހަގަކުރާ ދުވަހެވެ. މި ދުވަސް ފާހަގަކުރުމުގެ މައިގަނޑު މަގުސަދަކީ ލޭ ހަދިޔާކުރުމުގެ މުހިންމުކަމާ ގުޅޭގޮތުން އާންމުން ހޭލުންތެރިކުރުވުމާއި، ލޭ ހަދިޔާކުރާ ފަރާތްތަކުގެ އަގުވަޒަންކުރުމެވެ.
