ފެނަކަ ކޯޕަރޭޝަނުގެ މުވައްޒަފުންގެ އަދަދު މަދުކުރުމަށް ކުރަމުންދާ މަސައްކަތުގެ ތެރެއިން، އަމިއްލައަށް އެދިގެން ވަޒީފާއިން ވަކިވާ މުވައްޒަފުންނަށް ހަތަރު މަހުގެ މުސާރަ ދިނުމަށް އެ ކުންފުނިން މިއަދު ނިންމައިފިއެވެ. އެ ކުންފުނީގެ ޗީފް ކޯޕަރޭޓް އޮފިސަރު އުސައިދު ހަސަން ސޮއިކުރައްވައި ހުރިހާ ޑިޕާޓްމަންޓްތަކަށް ފޮނުއްވި މެމޯއެއްގައި ބުނެފައިވަނީ، މާދަމާއިން ފެށިގެން އަންނަ އާދިއްތަ ދުވަހުގެ މެންދުރުފަހު 15:00 އާ ހަމައަށް ވަޒީފާއިން ވަކިވުމަށް އެދި ހުށަހެޅުމުގެ ފުރުސަތު ހުޅުވާލެވިފައިވާ ކަމަށެވެ.
މި ނިންމުމަކީ ކުންފުނީގެ ހިންގުން ހަރުދަނާކޮށް ޚަރަދުތައް ކުޑަކުރުމަށް އަޅާ ފިޔަވަޅެއް ކަމަށް ފެނަކައިން ބުނެއެވެ. އެ ކުންފުނީގެ މެނޭޖިން ޑިރެކްޓަރު މުޙައްމަދު އަފީފް ހުސައިން މީގެ ކުރިން ވިދާޅުވެފައިވާ ގޮތުގައި، ފެނަކައިގައި މިހާރު ވެސް 8،000 އެއްހައި މުވައްޒަފުން މަސައްކަތް ކުރަމުންދާއިރު، އޭގެ ތެރޭގައި އެންމެ އެކަށޭނެ ގޮތެއްގައި މަސައްކަތް ނުކުރެވޭ މުވައްޒަފުން ތިބިކަން ވަނީ ފާހަގަކުރެވިފައެވެ. އެހެންކަމުން، ކުންފުނީގެ އޮނިގަނޑު އިސްލާހުކޮށް މުވައްޒަފުންގެ އަދަދު މުރާޖައާ ކުރުމަކީ ކުންފުނި ސަލާމަތްކުރުމަށް ކޮންމެހެން ބޭނުންތެރި ކަމެއް ކަމަށް މެނޭޖްމަންޓުން ދެކެއެވެ.
ފެނަކައަކީ ފާއިތުވި އަހަރުތަކުގައި ގެއްލުމުގައި ހިންގަމުން އައި ކުންފުންޏަކަށް ވާއިރު، އިންތިޚާބުތަކާ ދިމާކޮށް ސިޔާސީ ބޭނުމަށް ގިނަ އަދަދަކަށް މުވައްޒަފުން ނަގާފައިވާ ކަމުގެ ތުހުމަތުތައް އަބަދުވެސް ކުރެވެއެވެ. ދައުލަތުގެ ކުންފުނިތަކުގެ މުވައްޒަފުންނާއި ސިވިލް ސާވިސްގެ މުވައްޒަފުން އެއްކުރުމުން ޖުމްލަ 72،000 އަށް ވުރެ ގިނަ މީހުން ސަރުކާރުގެ މުސާރަދޭ ވަޒީފާތަކުގައި ތިބިކަން ތަފާސްހިސާބުތަކުން ދައްކައެވެ. މިއީ ރާއްޖޭގެ އާބާދީގެ ނިސްބަތުން ބޮޑު އަދަދެއް ކަމަށްވާތީ، ޚަރަދު ކުޑަކުރުމަށް މުވައްޒަފުން މަދުކުރަން ފިނޭންސް މިނިސްޓްރީން ވެސް ވަނީ މީގެ ކުރިން އަންގާފައެވެ.
އިގުތިސާދީ މާހިރުން ފާހަގަކުރައްވާ ގޮތުގައި، ދައުލަތުގެ ބަޖެޓުގެ ބޮޑު ބައެއް މުސާރައަށް ޚަރަދުކުރަން ޖެހުމަކީ ގައުމުގެ ތަރައްގީއަށް އޮތް ހުރަހެކެވެ. ބޭރުގެ މާލީ އިދާރާތަކުން ވެސް ދައުލަތުގެ ޚަރަދުތައް ކުޑަކުރުމަށް ތަކުރާރުކޮށް ގޮވާލަމުންދާއިރު، ފެނަކައިން މި ފެށި މަސައްކަތަކީ އެ އިސްލާހީ ފިޔަވަޅުތަކުގެ ބައެއް ކަމަށް ބެލެވެއެވެ. ނަމަވެސް، މިފަދަ ބަދަލުތަކުގެ ސަބަބުން ވަޒީފާތަކަށް އަންނާނެ ލޮޅުންތަކާ މެދު އާންމުންގެ މެދުގައި ވަނީ ކަންބޮޑުވުން އުފެދިފައެވެ.
