ކޯޓުގެ ހުރުމަތް ކެނޑި މައްސަލައެއްގައި ޖަލު ހުކުމް ތަންފީޒުކުރި ދެ ނޫސްވެރިން ކަމަށްވާ މުހައްމަދު ޝަހުޒާން އާއި މުހައްމަދު ލީވާން ވަކި ދެ ގޮޅިއަކަށް ބަދަލުކުރީ، އެމީހުން ތިބި ގޮޅިން މޯބައިލް ފޯނެއް ފެނިގެން ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ. މިނިސްޓަރު މިހެން ވިދާޅުވީ ޝަހުޒާން ޖަލުން މިނިވަންވުމަށްފަހު، އެމީހުން ވަކި ގޮޅިތަކަކަށް ބަދަލުކުރީ ރައީސް ޑރ. މުހައްމަދު މުއިއްޒު އަންގަވައިގެން ކަމަށް ބުނެ ކުރި ތުހުމަތުތަކަށް ރައްދު ދެއްވަވަމުންނެވެ.
މިނިސްޓަރު އިހުސާން އެކްސްގައި ކުރެއްވި ޕޯސްޓެއްގައި ވިދާޅުވީ، ޖަލުން މިނިވަންވުމަށްފަހު ޝަހުޒާން ދައްކަމުންދާ ވާހަކަތަކަކީ 100 އިންސައްތަ ދޮގު ވާހަކަތަކެއް ކަމަށެވެ. މިނިސްޓަރު ވިދާޅުވި ގޮތުގައި، 15 މެއި 2026 ވީ ދުވަހުގެ ރޭގަނޑު 19:35 ހާއިރު، އާންމު ފަރާތަކުން ލިބުނު މައުލޫމާތަކާ ގުޅިގެން ކަރެކްޝަންސްގެ އޮފިސަރުން ވަނީ ޝަހުޒާން އާއި ލީވާން ބަންދުކޮށްފައި ތިބި ގޮޅި ފާސްކޮށްފައެވެ.
އެމީހުންގެ ހާޒިރުގައި ގޮޅި ފާސްކުރިއިރު، ގޮޅީގައި ހުރި ކަބަޑެއްގެ ތެރޭގައި ހުރި އެއްޗެހީގެ ތެރެއިން މޯބައިލް ފޯނެއް ފެނިފައިވާ ކަމަށް މިނިސްޓަރު ހާމަކުރެއްވިއެވެ. މި މައްސަލައާ ގުޅިގެން، ޖަލުގެ އުސޫލުތަކާ އެއްގޮތަށް އެ ދެމީހުން މޮނިޓަރު ކުރުމަށްޓަކައި ވަކި ދެ ގޮޅިއަކަށް ބަދަލުކުރި ކަމަށާއި، އަދި ވަކި ވަގުތުތަކެއްގައި ގޮޅި ފާސްކުރަމުންދިޔައީ ވެސް އުސޫލުގެ ތެރެއިން ކަމަށް މިނިސްޓަރު ފާހަގަކުރެއްވިއެވެ.
"މިކަންކަމަކީ ވަކި ގައިދީއަކަށް ނުވަތަ ވަކި ފަރާތަކުން އަންގައިގެން ކުރާ ކަންކަމެއް ނޫން. އަމުދުން ޖަލުގެ މިފަދަ ކަންކަމަކީ ރައީސުލްޖުމްހޫރިއްޔާ ގޮތް ނިންމަވާ ކަންކަމެއް ނޫން،" މިނިސްޓަރު ވިދާޅުވިއެވެ. އަދި އެމަނިކުފާނުގެ ވަޒީރުކަމުގައި ރައީސް މުއިއްޒު ދުވަހަކުވެސް ޖަލުގެ މިފަދަ ކަންކަމާ އެއްވެސް މިންވަރަކަށް އިރުޝާދެއް ދެއްވާފައި ނުވާކަމަށްވެސް އިހުސާން ވިދާޅުވިއެވެ.
މިނިސްޓަރު އިތުރަށް ވިދާޅުވީ، ރާއްޖޭގެ ތަފާތު ތިން ނޫސްވެރިއަކު މިކަމާ ގުޅޭގޮތުން ސުވާލުކުރުމުން އެ މައުލޫމާތު ސާފުކޮށްދެއްވާފައިވާނެ ކަމަށެވެ. ނަމަވެސް އެއިން އެއްވެސް ފަރާތަކުން އެ ހަގީގަތް ހާމަކޮށްފައިނުވާތީ މިނިސްޓަރު ވަނީ ކަންބޮޑުވުން ފާޅުކުރައްވާފައެވެ. ޖަލަށް ވައްދަން މަނާ ތަކެތި ފެނުނު މި މައްސަލަ މިހާރު މޯލްޑިވްސް ޕޮލިސް ސާވިސްއިން ދަނީ ތަހުގީގު ކުރަމުންނެވެ.
ޝަހުޒާން އާއި ލީވާން ޖަލަށްލާފައިވަނީ "އަދަދު" ނޫހުން ނެރުނު ޑޮކިއުމެންޓްރީއާ ގުޅޭ އެއްވެސް ވާހަކައެއް ދެއްކުން ކޯޓުން މަނާކޮށްފައި ވަނިކޮށް، އެއާ ހިލާފުވެ ކޯޓުގެ ހުރުމަތް ކެނޑިކަމަށް ކަނޑައަޅައިގެންނެވެ. އެ މައްސަލާގައި ޝަހުޒާން 15 ދުވަހަށް އަދި ލީވާން 10 ދުވަހަށް ޖަލަށްލުމަށް ކޯޓުން ހުކުމްކުރިއެވެ.
