ފިނޭންސް މިނިސްޓްރީން ބުނީ މުސާރަ ދޫކުރުމުގެ ތަރުތީބަށް ބަދަލު ގެނައީ އީދު ބަންދާއި ބޭންކުތައް ހުޅުވާފައި ހުންނާނެ ވަގުތުތަކަށް ރިއާޔަތްކުރުމަށްފަހު ކަމަށެވެ. އީދު ބަންދާ ގުޅިގެން މި މަހުގެ 22 އިން ފެށިގެން ސަރުކާރު އޮފީސްތައް ބަންދުކޮށްފައިވާއިރު، އޮފީސްތައް އަލުން ހުޅުވުމަށް ހަމަޖެހިފައިވަނީ މި މަހުގެ 31 ވަނަ ދުވަހުއެވެ.
ބަންދު ދުވަސްތަކުގެ ތެރެއިން ބޭންކުތައް ހުޅުވާނީ ހަމައެކަނި މެއި 28 ވާ ބުރާސްފަތި ދުވަހުއެވެ. އެހެންކަމުން، ބޭންކު ހުޅުވާ ދުވަސް ކަމަށްވާ 28 މެއި އަދި ސަރުކާރު އޮފީސްތައް ހުޅުވޭ 31 މެއި ގައި މުސާރަ އާއި އިނާޔަތްތައް ޖަމާކުރުމުގެ މަސައްކަތް ކުރިއަށްދާނެ ކަމަށް މިނިސްޓްރީން ބުންޏެވެ.
މީގެއިތުރުން ފިނޭންސް މިނިސްޓްރީން ފާހަގަކުރި ގޮތުގައި، ދައުލަތުގެ މާލިއްޔަތު ގަވާއިދު ބުނާގޮތުން ކޮންމެ މަހެއްގެ މުސާރަ ދޫކުރަންޖެހެނީ އެ މަހެއްގެ ރަސްމީ ބަންދު ނޫން ފަހު ތިން ދުވަހުގެ ތެރޭގައެވެ. އަދި ސަރުކާރުން މުސާރަ ދޫކުރަމުންދަނީ އެ ގަވާއިދާ އެއްގޮތްވާ ގޮތުގެ މަތިން ކަމަށްވެސް އެ މިނިސްޓްރީން ވަނީ ބުނެފައެވެ.
