މާލެއާއި ހުޅުމާލެއަށް ކަރަންޓުގެ ޚިދުމަތް ފޯރުކޮށްދޭ ސްޓެލްކޯގެ 50 މެގަވޯޓްގެ އިންޖީނުގެ އަޕްގްރޭޑް ކުރުމުގެ މަސައްކަތަށްފަހު، ޖަނަރޭޓަރުތަކަށް ދިމާވި ޓެކްނިކަލް މައްސަލައަކާ ގުޅިގެން މިއަދު މެންދުރު 12:00 ހާއިރު މާލެއާއި ހުޅުމާލޭގެ ބޮޑު ސަރަހައްދަކުން ކަރަންޓުގެ ޚިދުމަތް މެދުކެނޑިއްޖެއެވެ.
ސްޓެލްކޯއިން މައުލޫމާތު ދޭ ގޮތުގައި، މި މައްސަލަ ދިމާވީ އިންޖީނުގެ އަޕްގްރޭޑް ކުރުމުގެ މަސައްކަތް ނިންމާލިތަނާހެންނެވެ. މައްސަލަ ހައްލުކުރުމަށްފަހު ބައެއް ސަރަހައްދުތަކަށް ގަޑިއިރެއްހާއިރު ފަހުން ކަރަންޓު ދޫކުރަން ފެށި ނަމަވެސް، ހުރިހާ ސަރަހައްދަކަށް އަދިވެސް ޚިދުމަތް އެއްކޮށް އިއާދަކުރެވިފައި ނުވާކަން އެ ކުންފުނިން ފާހަގަކުރެއެވެ.
ކުރިން މާލޭގެ އެކި ސަރަހައްދުތަކުން ކަރަންޓު ކެނޑެމުންދިޔައީ މަގުކޮނުމުގެ ތެރޭގައި ކޭބަލްތަކަށް ލިބޭ ގެއްލުމުގެ ސަބަބުން ކަމަށްވީ ނަމަވެސް، މިފަހަރު ދިމާވީ ސީދާ ޓެކްނިކަލް މައްސަލައެއް ކަމަށް ސްޓެލްކޯއިން ވަނީ ބުނެފައެވެ. މި މައްސަލަ ހައްލުކޮށް ހުރިހާ ސަރަހައްދަކަށް ވީ އެންމެ އަވަހަކަށް ކަރަންޓު ދިނުމުގެ މަސައްކަތް އެ ކުންފުނީގެ އިންޖީނޭރުން ދަނީ ކުރަމުންނެވެ.
ކުއްލިއަކަށް މިފަދަ ބޮޑު މައްސަލައެއް ދިމާވެ، ގިނަ ވަގުތުތަކަކަށް ކަރަންޓުގެ ޚިދުމަތް މެދުކެނޑުމާ ގުޅިގެން އާންމުންގެ ގިނަ ފާޑުކިޔުންތަކެއް ސްޓެލްކޯއަށް ވަނީ އަމާޒުވެފައެވެ. ވަކިން ހާއްސަކޮށް މެންދުރުގެ ހޫނުގަދަ ވަގުތެއްގައި ކަރަންޓު ކެނޑުމުން އާންމު ދިރިއުޅުމަށާއި ވިޔަފާރިތަކަށް ބޮޑެތި ދަތިތަކެއް ވަނީ ކުރިމަތިވެފައެވެ.
