ބަލި ރާއްޖެއަށް އައުމުގެ ފުރުސަތު ކުޑަ ނަމަވެސް، ރައްކާތެރިކަމުގެ ފިޔަވަޅެއްގެ ގޮތުން އެބޯލާ ފެތުރެމުންދާ ސަރަހައްދުތަކަށް ދިވެހިން ދަތުރުނުކުރުމަށް އެޗްޕީއޭއިން ވަނީ އިރުޝާދު ދީފައެވެ. މި ބަލިމަޑުކަން މިހާރު އެންމެ ބޮޑަށް ފެތުރެމުންދަނީ ޑިމޮކްރެޓިކް ރިޕަބްލިކް އޮފް ކޮންގޯ އާއި ޔޫގެންޑާގައެވެ. މި ބަލި ފެތުރެނީ "ބަންޑިބުގްޔޯ" ނަމަކަށް ކިޔާ ވައިރަހެއްގެ ސަބަބުންނެވެ.
އެފްރިކާގެ ހާލަތު
ޑަބްލިޔުއެޗްއޯގެ ތަފާސްހިސާބުތައް ދައްކާގޮތުން، ކޮންގޯގެ އިޓޫރީ ޕްރޮވިންސުން އެކަނިވެސް ބަލީގެ އަލާމާތްތައް ހުރި 246 މީހަކު ވަނީ ފެނިފައެވެ. އޭގެ ތެރެއިން 80 މީހަކު މިހާތަނަށް ވަނީ މަރުވެފައެވެ. މިއީ 1976 ވަނަ އަހަރު މި ބަލި ފުރަތަމަ ފެނުނު ފަހުން ކޮންގޯގައި މިފަދަ ހާލަތެއް އިއުލާނުކުރި 17 ވަނަ ފަހަރެވެ. މިހާރު މި ވައިރަސް ވަނީ ކޮންގޯގެ ވެރިރަށް ކިންޝާސާ އާއި ޔޫގެންޑާގެ ވެރިރަށް ކަމްޕާލާއަށް ވެސް ފޯރާފައެވެ.
ސިއްހީ މާހިރުން ކަންބޮޑުވުން ފާޅުކުރާ އެންމެ ބޮޑު ސަބަބަކީ، އެހެން އެބޯލާ ވައިރަސްތަކާ ހިލާފަށް، މިހާރު ފެތުރެމުންދާ ބަންޑިބުގްޔޯ ވައިރަހުން ރައްކާތެރިވުމަށް ދެވޭނެ އެއްވެސް ވެކްސިނެއް ނުވަތަ ފަރުވާއެއް މިހާތަނަށް ހޯދިފައި ނެތުމެވެ. ބައްޔަށް ޝައްކުކުރެވޭ މީހުންގެ އަދަދު ދުވަހެއް ދުވަހަކަށް އިތުރުވަމުންދާއިރު، ޓެސްޓުތައް ޕޮޒިޓިވްވާ ރޭޓުވެސް އުޅެނީ ނިސްބަތުން މަތީގައެވެ.
