މި މައްސަލަތަކުގައި ކަމާބެހޭ އިދާރާތަކުން ކުރި ހަލުވި މަސައްކަތުން، ގެއްލުނު ފައިސާގެ 70 އިންސައްތަ ނުވަތަ 227,828.00 ރުފިޔާ ވަނީ އަނބުރާ ހޯދިފައެވެ. މިއީ މައްސަލަ ރިޕޯޓްކުރާ ވަގުތުން ފެށިގެން އެޅޭ އަވަސް ފިޔަވަޅުތަކާއި ތަހުގީގީ މަރުހަލާގައި ކުރެވޭ މަސައްކަތްތަކުން ލިބުނު ބޮޑު ކުރިއެރުމެކެވެ.
ތަފާސްހިސާބުތަކުން ދައްކާ ގޮތުގައި އެންމެ ގިނައީ އޮންލައިން ވިޔަފާރީގެ ތެރެއިން ހިންގާފައިވާ ސްކޭމްތަކެވެ. މިގޮތުން އޮންލައިންކޮށް މުދާ ގަނެވިއްކުމުގެ ތެރެއިން އޮޅުވާލައިގެން ހިންގި 30 މައްސަލައެއް ވަނީ ހުށަހަޅާފައެވެ. މީގެ އިތުރުން ބޭރު ފައިސާ މާރުކުރުމާއި، މީހުންގެ ނަމުގައި އޮޅުވާލައިގެން ފައިސާ ހޯދުމުގެ މައްސަލަތައް ވެސް ވަނީ ފާހަގަކުރެވިފައެވެ.
އެންޓި-ސްކޭމް ސެންޓަރުން އިލްތިމާސްކުރަނީ އޮންލައިންކޮށް ވިޔަފާރިކުރާއިރު ވިއްކާ ފަރާތުގެ ސައްހަކަން ކަށަވަރުކުރުމަށާއި، ރަސްމީ ނިޒާމުން ބޭރުން ފައިސާ މާރުނުކުރުމަށެވެ. އަދި ޝައްކުކުރެވޭ ކަމެއް ފާހަގަވުމާއެކު ލަސްނުކޮށް ފުލުހުންނަށް ރިޕޯޓްކުރުމަކީ ގެއްލޭ ފައިސާ އަނބުރާ ހޯދުމުގެ ފުރުސަތު އިތުރުވާނެ ކަމެއް ކަމަށް އެ ސެންޓަރުން ބުނެއެވެ.
