ވ. ފުލިދޫގައި މޫދަށް އެރި އުޅުމުގެ ތެރޭގައި އޮޔާދިޔަ ދެ ކުއްޖަކު ސަލާމަތްކުރަން މަސައްކަތް ކުރި އެ ކުދިންގެ ބައްޕަ މިއަދު ނިޔާވެއްޖެއެވެ. މި ހާދިސާގައި ނިޔާވެފައިވަނީ އުމުރުން 63 އަހަރުގެ ދިވެހި ފިރިހެނެކެވެ.
ފުލުހުން ވިދާޅުވި ގޮތުގައި، އޮޔާދިޔަ ދެ ކުދިން ސަލާމަތްކުރަން އުޅުމުގެ ތެރޭގައި އެ މީހާގެ ހާލު ދެރަވެގެން ފުލިދޫ ސިއްހީ މަރުކަޒަށް ގެންގޮސް ފަރުވާ ދެމުން ދަނިކޮށް ވަނީ ނިޔާވެފައެވެ. މި ހާދިސާ ހިނގާފައިވަނީ މިއަދު ހަވީރު 3:10 އެހާކަންހާއިރު ކަމަށް ފުލުހުން މައުލޫމާތު ދެއެވެ.
މި ހާދިސާއާ ގުޅޭގޮތުން ފުލިދޫން ވާހަކަ ދެއްކި މީހަކު ބުނީ، ނިޔާވި މީހާއަކީ އާއިލާއާއެކު ހަފްތާ ބަންދަށް އެ ރަށަށް ގޮސް އުޅުނު މީހެއް ކަމަށެވެ. އޮޔާދިޔައީ އުމުރުން 13 އަހަރާއި 15 އަހަރާ ދެމެދުގެ ދެ އަންހެން ކުދިން ކަމަށާއި، މި ހާދިސާގައި އެ ދެ ކުދިން ސަލާމަތްވެފައިވާ ކަމަށްވެސް އޭނާ ބުންޏެވެ.
މި ހާދިސާއާ ގުޅިގެން ބަލަންޖެހޭ އިތުރު ކަންކަން ފުލުހުން މިހާރު ދަނީ ތަހުގީގު ކުރަމުންނެވެ. މިއީ މި ހަފްތާ ބަންދުގައި މޫދަށް އެރި އުޅުމުގެ ތެރޭގައި ހިނގި ހިތާމަވެރި ހާދިސާއެކެވެ.
