މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އަށް ނިމިދިޔަ ޖުލައި މަހު އާމްދަނީގެ ގޮތުގައި 3.41 ބިލިއަން ރުފިޔާ ލިބިއްޖެއެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު 0.2 އިންސައްތައިގެ ކުޑަ ކުރިއެރުމެކެވެ. ނަމަވެސް، މިއީ ޖުލައި މަހު ލިބޭނެ ކަމަށް މީރާއިން އަންދާޒާކުރި މިންވަރަށްވުރެ 3.6 އިންސައްތަ ދަށް އަދަދެކެވެ.
މިދިޔަ އަހަރާ އަޅާބަލާއިރު އާމްދަނީ އިތުރުވުމަށް މެދުވެރިވި ސަބަބުތަކުގެ ތެރޭގައި ބޭންކް އިންކަމް ޓެކްސް، ބިން ވިއްކުމާއި ބަދަލުކުރުމުގެ ފީ، ޖީޖީއެސްޓީ (އާންމު މުދަލާއި ޚިދުމަތުގެ ޓެކްސް) އަދި ރިސޯޓުތަކުގެ ކުލީގެ ގޮތުގައި ލިބުނު އާމްދަނީ އިތުރުވުން ހިމެނެއެވެ.
މި ކުރިއެރުންތައް ލިބުނު ނަމަވެސް، ކޯޕަރޭޓް އަދި އިންޑިވިޖުއަލް ނޫން އެހެނިހެން ފަރާތްތަކުގެ އިންކަމް ޓެކްސް އާއި ނޮން-ރެސިޑެންޓް ވިތުހޯލްޑިންގ ޓެކްސްގެ ގޮތުގައި ލިބުނު އާމްދަނީ އަންދާޒާކުރި ވަރަށްވުރެ ދަށްވުމުން، ޖުމްލަ އާމްދަނީ ވަނީ ލަފާކުރި މިންވަރަށްވުރެ ދަށްވެފައެވެ. މީގެ އިތުރުން، ފަތުރުވެރިން ޒިޔާރަތްކުރި އަދަދު 3.1 އިންސައްތަ ދަށްވުމާއި، ސަރުކާރު ބަންދު ދުވަސްތަކާ ގުޅިގެން އިންކަމް ޓެކްސް ދެއްކުމުގެ ސުންގަޑި އޮގަސްޓް 2 އަށް އިތުރުކުރުމަކީވެސް ޖުލައި މަހުގެ އާމްދަނީ ދަށްވުމަށް މެދުވެރިވި ސަބަބެކެވެ.
މީރާއިން ހާމަކޮށްފައިވާ ގޮތުގައި، ނުދައްކާ ހުރި ފައިސާގެ ތެރެއިން 449 މިލިއަން ރުފިޔާ މިދިޔަ މަހު ވަނީ ހޯދާފައެވެ. މީގެ ތެރެއިން 248 މިލިއަން ރުފިޔާ ހޯދާފައިވަނީ ރަސްމީ ނޯޓިސް ފޮނުވައިގެންނެވެ. އަދި ފޯނުން ގުޅައިގެން ހަނދާންކޮށްދީގެން 30 މިލިއަން ރުފިޔާ ވަނީ ހޯދާފައެވެ.
ޖުމްލަ ގޮތެއްގައި، ޖުލައި މަހު ލިބުނު އާމްދަނީގެ 18.4 އިންސައްތައަކީ ސުންގަޑި ހަމަވި ފަހުން ދައްކާފައިވާ ފައިސާއެވެ. އަދި 11 އިންސައްތަ އާމްދަނީއަކީ ނުދައްކާ ހުރި ފައިސާ ހޯދުމަށް މީރާއިން ކުރި ހީވާގި މަސައްކަތުން ހޯދާފައިވާ ފައިސާއެވެ.
