އާޓިފިޝަލް އިންޓެލިޖެންސް (އޭއައި) އާއި ފިންޓެކް އަދި ޑިޖިޓަލް އިނޮވޭޝަނަށް ޚާއްޞަކޮށްގެން ބާއްވާ "އޭއައިކޮނޮމީ ސަމިޓް" ގެ ރާއްޖޭގެ ރަސްމީ މީޑިއާ ޕާޓްނަރަކަށް އާރް24 އަދި ރާއްޖެ24 ހަމަޖައްސައިފިއެވެ. މި ޕާޓްނަރޝިޕްގެ ސަބަބުން ދެކުނު އޭޝިއާ ސަރަޙައްދުގައި ބާއްވާ މި ބޮޑު ސަމިޓުގައި ރާއްޖޭގެ ޔުނިވަރސިޓީތަކާއި، ކޮލެޖްތަކާއި، ދަރިވަރުންގެ އިތުރުން ވިޔަފާރިވެރިންނަށް ބައިވެރިވުމުގެ ފުރުޞަތު ފުޅާވެގެންދާނެއެވެ.
2027 ވަނަ އަހަރުގެ ޖެނުއަރީ މަހު ސްރީލަންކާގައި ބޭއްވުމަށް ހަމަޖެހިފައިވާ މި ސަމިޓަކީ ސިޔާސަތު ކަނޑައަޅާ ފަރާތްތަކާއި، އިންވެސްޓަރުންނާއި، އެކަޑަމިކް ދާއިރާގެ އިސް ބޭފުޅުން އަދި ޓެކްނޮލޮޖީ ލީޑަރުން އެއްތަނަކުން ބައްދަލުވެ، އޭއައިގެ ސަބަބުން އިޤްތިޞާދަށް އަންނަ ބަދަލުތަކާ ގުޅޭގޮތުން މަޝްވަރާކުރުމަށް ފަރުމާކޮށްފައިވާ ޕްލެޓްފޯމެކެވެ.
"އޭއައިކޮނޮމީ ސަމިޓަކީ ހަމައެކަނި ކޮންފަރެންސެއް ނޫން. މިއީ ލީޑަރޝިޕާއި، އިނޮވޭޝަން އަދި އިންވެސްޓްމަންޓް މުސްތަޤުބަލުގެ އިޤްތިޞާދާ ގުޅުވައިދޭ ސަރަޙައްދީ ޕްލެޓްފޯމެއް،" ސަމިޓްގެ ފަރާތުން ހާމަކޮށްފައިވެއެވެ.
މި ސަމިޓްގެ ތެރެއިން ބާއްވާ "އިންޓަރނޭޝަނަލް އޭއައި ޗެލެންޖް" އަކީ ދިވެހި ކޮލެޖްތަކާއި ޔުނިވަރސިޓީތަކަށް ލިބޭ ރަނގަޅު ފުރުޞަތެކެވެ. މި މުބާރާތުގައި ތަޢުލީމީ ދާއިރާ، ޞިއްޙީ ދާއިރާ، ފަތުރުވެރިކަން އަދި ކުދި ވިޔަފާރިތަކަށް ދިމާވާ މައްސަލަތަކަށް އޭއައި ބޭނުންކޮށްގެން ހައްލު ހޯދައިދޭނެ ޕްރޮޓޯޓައިޕްތައް ދަރިވަރުންނަށް ހުށަހެޅޭނެއެވެ. މި މުބާރާތުން މޮޅުވާ ފަރާތްތަކަށް ފައިސާގެ އިނާމުގެ އިތުރުން، އިންވެސްޓަރުންނާ ބައްދަލުވެ އެމީހުންގެ އުފެއްދުންތަކަށް ފަންޑު ހޯދުމުގެ ފުރުޞަތު ލިބިގެންދާނެއެވެ.
އާރް24 އަދި ރާއްޖެ24 އާއެކު ވެވުނު މި އެއްބަސްވުމުގެ ދަށުން، ރާއްޖޭގެ މާކެޓުގައި މި ސަމިޓާ ގުޅޭ ހޭލުންތެރިކަން އިތުރުކޮށް، ދިވެހި އީޖާދުވެރިންގެ ވާހަކަތައް ބައިނަލްއަޤްވާމީ ފެންވަރުގައި ފާހަގަކުރުމަށް މަސައްކަތް ކުރެވޭނެއެވެ.
މި ސަމިޓާ ގުޅޭ އިތުރު މަޢުލޫމާތު ހޯދުމަށް md@aiconomysummit.com އަށް އީމެއިލް ކުރުމަށް ނުވަތަ +94 703 626699 އަށް ގުޅުމަށް އިންތިޒާމްކުރާ ފަރާތުން އެދެއެވެ.
