ޗައިނާ ސަރުކާރުގެ އެހީގައި ކުރިއަށްގެންދާ މާލެ އަދި ވިލިމާލޭގެ މަގުތައް އަލުން ތަރައްގީކުރުމުގެ މަޝްރޫއުގެ ދަށުން، މަގުތަކުގެ ޑިޒައިން ފައިނަލް ކުރުމަށް ބޭނުންވާ ސާވޭގެ މަސައްކަތްތައް ކުރިއަށްދާ ގޮތް ބައްލަވާލެއްވުމަށް މިނިސްޓަރ އޮފް އިނފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް ޑރ. އަބްދުﷲ މުއްތަލިބާއި ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލީޝިންސައިޓަށް ޒިޔާރަތްކުރައްވައިފިއެވެ.
މި މަޝްރޫއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާއަށް ކުރެއްވި ފުރަމާނަ ދަތުރުފުޅުގެ ތެރެއިން އެއްބަސްވެވުނު މުހިންމު މަޝްރޫއެކެވެ. ޗައިނާ ސަފީރު ވިދާޅުވި ގޮތުގައި، ވޭތުވެދިޔަ ދެ އަހަރު ދުވަހުގެ ތެރޭގައި ދެ ގައުމުގެ ފަންނީ ޓީމުތަކުން ވަނީ މި މަޝްރޫއުގެ ފީޒިބިލިޓީ ސްޓަޑީޒްތަކާއި ދިރާސާތައް ފުރިހަމަކޮށްފައެވެ.
މަޝްރޫއާ ގުޅޭގޮތުން ވާހަކަދައްކަވަމުން ސަފީރު ފާހަގަކުރެއްވި ގޮތުގައި، ކުރިއަށް އޮތް މަސައްކަތްތަކަކީ ގޮންޖެހުންތައް ބޮޑު މަސައްކަތްތަކެކެވެ. އޭގެ ތެރޭގައި މަގުތަކުގެ އަޑީގައިވާ ފެން ހިންދާ ނިޒާމުތައް އަލުން ގާއިމުކުރުން ހިމެނެއެވެ. އަދި މަސައްކަތް ކުރިއަށްދާއިރު އާންމުންގެ ދިރިއުޅުމަށް އަންނާނެ ދަތިތައް ވީހާވެސް ކުޑަކުރުމަށް އިސްކަންދެއްވާނެ ކަމަށް ސަފީރު ވިދާޅުވިއެވެ.
"މި މަޝްރޫއު ކާމިޔާބުކަމާއެކު ނިންމާލުމަށް ޗައިނާ ސަރުކާރުން އޮތީ ސާބިތުކަމާއެކު. އަޅުގަނޑުމެންގެ މާހިރުންނަށް މި ގޮންޖެހުންތަކުން އަރައިގަނެވޭނެ ކަމުގެ ފުރިހަމަ އިތުބާރު އެބައޮތް،" ސަފީރު ވިދާޅުވިއެވެ.
މިނިސްޓަރ މުއްތަލިބާއި މިނިސްޓްރީގެ މުވައްޒަފުންގެ ފަރާތުން ލިބޭ އެއްބާރުލުމަށް ސަފީރު ޝުކުރު އަދާކުރެއްވިއެވެ. އަދި މި މަޝްރޫއު ކުރިއަށްދާއިރު މާލެ އާއި ވިލިމާލޭގެ ރައްޔިތުންގެ ފަރާތުން ލިބޭނެ އެއްބާރުލުމާއި ކެތްތެރިކަމަށްޓަކައި ކުރިއަށް ފާޅުކޮށް ޝުކުރު އަދާކުރެއްވިއެވެ.
