ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި އިލެކްޝަނުގައި ސަރުކާރު ހިންގާ ޕީއެންސީ (ކޮންގްރެސް) ގެ ފަރާތުން ވާދަކުރާނެ ކެންޑިޑޭޓަކަށް ހިތަދޫ މޫލެކެޑެ ދާއިރާގެ މިހާރުގެ ކައުންސިލަރު އަހްމަދު ސައީދު ހަމަޖައްސައިފި އެވެ. މިގޮތަށް ނިންމީ އެ ދާއިރާގެ ޕްރައިމަރީ ކާމިޔާބު ކުރެއްވި ކުރީގެ މެންބަރު މުޙައްމަދު ސިނާން އިންތިޚާބުގައި ވާދަނުކުރަން ނިންމެވުމާ ގުޅިގެންނެވެ.
ކޮންގްރެސް ޕާޓީން މިއަދު ބޭއްވި ނޫސްވެރިންގެ ބައްދަލުވުމެއްގައި ޕާޓީގެ ނައިބު ރައީސް އަދި ފިޝަރީޒް މިނިސްޓަރު އަހްމަދު ޝިޔާމް ވިދާޅުވީ، އިންތިޚާބަށް ކުޑަދުވަސްކޮޅަކަށް ވެފައިވުމުން އިތުރު ޕްރައިމަރީއެއް ބޭއްވުމުގެ ވަގުތު ނެތުމާއެކު، ޕާޓީގެ ޓިކެޓް ސައީދަށް ދޭން ނިންމާފައިވާ ކަމަށެވެ. ހިތަދޫ އުތުރު ދާއިރާގެ ގޮނޑި ހުސްވީ ސިނާންގެ ސާބިތު ދަރަންޏެއް އޮތުމުން އޭނާގެ މެންބަރުކަމުގެ ޝަރުތު ގެއްލިފައިވާ ކަމަށް ސުޕްރީމް ކޯޓުން ކަނޑައެޅުމާ ގުޅިގެންނެވެ.
ސިނާން ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ދާއިރާގެ ރައްޔިތުންނާ މަޝްވަރާ ކުރުމަށްފަހު މިފަހަރުގެ ގޮނޑި ޕާޓީއަށް ކާމިޔާބުކޮށްދިނުމަށް އެންމެ ރަނގަޅު ގޮތަކީ އޭނާ ފަހަތަށް ޖެހި އައު ބޭފުޅަކަށް ފުރުސަތު ދިނުން ކަމަށް ފެންނާތީ އެގޮތަށް ނިންމެވީ ކަމަށެވެ. އަދި އޭނާ ވާދަނުކުރެއްވި ނަމަވެސް، ޕާޓީން ނުކުންނަ ކެންޑިޑޭޓް ހޮވުމަށް ފުރިހަމަ ތާއީދާއި އެހީތެރިކަން ދޭނެ ކަމުގެ ޔަގީންކަން ސިނާން ވަނީ ދެއްވާފަ އެވެ.
އިލެކްޝަންސް ކޮމިޝަނުން ހާމަކޮށްފައިވާ ގޮތުގައި ހިތަދޫ އުތުރު ދާއިރާގެ ބައި އިލެކްޝަން ބޭއްވުމަށް ހަމަޖެހިފައިވަނީ އަންނަ ޖޫން މަހުގެ ހަ ވަނަ ދުވަހު އެވެ. މި އިންތިޚާބަށް ކުރިމަތިލުމުގެ ފުރުސަތު އަންނަ މަހުގެ ދެ ވަނަ ދުވަހުގެ މެންދުރުފަހު 3:00 އާ ހަމައަށް ވަނީ ހުޅުވާލާފަ އެވެ.
