ޣައްޒާގެ އުތުރުގައި އާއިލާތަކަށް ސާފު ބޯފެން ފޯރުކޮށްދިނުމުގެ މަސައްކަތުގައި އުޅުނު ޔުނިސެފްގެ ކޮންޓްރެކްޓް ދެ ޑްރައިވަރަކު، އިސްރާއީލު ސިފައިންގެ ހަމަލާދީ މަރާލުމާ ގުޅިގެން އދ. ގެ ކުޑަކުދިންނާ ބެހޭ ޖަމިއްޔާ (ޔުނިސެފް) އިން ނުރުހުން ފާޅުކޮށްފިއެވެ.
ޔުނިސެފުން ނެރުނު ބަޔާނެއްގައި ބުނެފައިވަނީ މި ހާދިސާ ހިނގާފައިވަނީ މިއަދު ހެނދުނުގެ ވަގުތެއްގައި، ޣައްޒާގެ އުތުރުގައި ހުންނަ އަލް-މަންސޫރާ ފެން ފުރާ ޕޮއިންޓުގައި ކަމަށެވެ. މި ހަމަލާގައި ދެ މީހަކު މަރުވުމުގެ އިތުރުން، އިތުރު ދެ މީހަކަށް އެކިވަރުގެ އަނިޔާތައް ލިބިފައިވާ ކަމަށްވެސް އެ ޖަމިއްޔާއިން ބުނެފައިވެއެވެ.
މި ހާދިސާ ހިނގާފައިވަނީ އާންމުކޮށް ފެން އުފުލުމުގައި އަމަލުކުރާ އުސޫލުތަކާ އެއްގޮތަށް މަސައްކަތް ކުރަމުން ދަނިކޮށް ކަމަށް ޔުނިސެފުން ފާހަގަކުރެއެވެ. "މި ހާދިސާ ހިނގީ އެއްވެސް ބަދަލެއް ނުގެނެސް، އާންމުކޮށް ކުރިއަށްގެންދާ ފެން އުފުލުމުގެ މަސައްކަތުގެ ތެރެއިން،" ޔުނިސެފްގެ ބަޔާނުގައިވެއެވެ. އަލް-މަންސޫރާ އަކީ ގާޒާ ސިޓީއަށް ފެން ފޯރުކޮށްދޭ މައި ސަޕްލައި ލައިނަށް ފެން ބަރުކުރަން އޮތް ހަމައެކަނި ތަނެވެ.
ޔުނިސެފުން ބުނި ގޮތުގައި އެ ފެން ފުރާ ޕޮއިންޓަކީ އެތައް ހާސް ބަޔަކަށް، ހާއްސަކޮށް ކުޑަކުދިންނަށް ބޭނުންވާ ސާފު ބޯފެން ފޯރުކޮށްދިނުމަށް ދުވާލަކު އެތައް ފަހަރަކު ބޭނުންކުރާ ތަނެކެވެ. މި ހާދިސާއާ ގުޅިގެން، އެ ސަރަހައްދުގެ ސަލާމަތީ ކަންކަން ކަށަވަރުވަންދެން އެތަނުގައި ކުރިއަށްގެންދާ ހުރިހާ ހަރަކާތްތަކެއް މިހާރު ވަނީ މެދުކަނޑާލާފައެވެ.
ޔުނިސެފުން ވަނީ މި ހާދިސާ ވަގުތުން ތަހުގީގުކޮށް، ޒިންމާވާންޖެހޭ ފަރާތްތައް ޖަވާބުދާރީ ކުރުވުމަށް އިސްރާއީލުގެ ކަމާބެހޭ ފަރާތްތަކަށް ގޮވާލާފައެވެ. އަދި އިންސާނީ އެހީތެރިކަން ފޯރުކޮށްދޭ މީހުންނާއި، އަސާސީ ހިދުމަތްދޭ ފަރާތްތަކުގެ އިތުރުން ފެން ފޯރުކޮށްދޭ ވަސީލަތްތަކަކީ ދުވަހަކުވެސް ހަމަލާ އަމާޒުކުރަންޖެހޭ ތަންތަން ނޫން ކަމަށް އެ ޖަމިއްޔާއިން ބުންޏެވެ.
މި ހަމަލާއާ ގުޅޭގޮތުން ވޮޝިންޓަންގައި ހުންނަ އިސްރާއީލުގެ އެމްބަސީން އަދި ވަކި އެއްޗެއް ބުނެފައެއް ނުވެއެވެ. މިދިޔަ އޮކްޓޫބަރު މަހު ގާއިމުކުރި ހަނގުރާމަ ހުއްޓާލުމުގެ އެއްބަސްވުމަށްފަހުވެސް، ޣައްޒާގައި ހިނގަމުންދާ ހަމަލާތަކުގައި މިހާތަނަށް 750 އަށްވުރެ ގިނަ ފަލަސްތީނު މީހުން ވަނީ މަރުވެފައެވެ.
