މިއީ 2022 ވަނަ އަހަރުގެ އޮގަސްޓް މަހުގެ 6 ވަނަ ދުވަހުގެ ރޭ ހ. ޝީރީންވިލާގައި ފުވައްމުލަކަށް ނިސްބަތްވާ އުމުރުން 22 އަހަރުގެ ޝިއާއު މުހައްމަދު ސައީދު މަރާލި މައްސަލާގައި ސާހިލްގެ މައްޗަށް އުފުލާފައިވާ ފަސް ދައުވާގެ ތެރެއިން ސާބިތުވި ދެ ދައުވާއާ ގުޅިގެން އިއްވި ހުކުމެކެވެ. ކޯޓުން ނިންމީ އެ ދެ ކުށުގެ އުގޫބާތެއްގެ ގޮތުން 3 އަހަރާއި 1 މަހާއި 6 ދުވަހުގެ ޖަލު ހުކުމެއް އޭނާއަށް އިއްވުމަށެވެ.
މި މައްސަލައިގެ ޝަރީއަތްތައް ކުރިއަށް ގެންދަނީ އާންމުކޮށް ހުޅުވާނުލައި ސިއްރުކޮށްގެން ކަމަށްވާތީ، ސާބިތުވި ދެ ދައުވާއަކީ ސީދާ ކޮބައިކަން ކޯޓުން ހާމަކޮށްފައެއް ނުވެއެވެ. ނަމަވެސް، ޕްރޮސެކިއުޓާ ޖެނެރަލްގެ އޮފީހުން މީގެ ކުރިން ބުނެފައިވާ ގޮތުގައި ސާހިލްގެ މައްޗަށް އުފުލާފައިވާ ދައުވާތަކުގެ ތެރޭގައި ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާއާއި، އޮރިޔާން ކާޑު ގެންގުޅުމުގެ ދައުވާއާއި، ކެނަބިސް ބޭނުންކުރުމުގެ ދައުވާ ހިމެނެއެވެ.
ޝަރީއަތުގެ މަރުހަލާގައި ސާހިލްގެ ފަރާތުން އެއްވެސް ވަރަކަށް އެއްބާރުލުން ނުލިބޭކަން ދައުލަތުން ވަނީ ފާހަގަކޮށްފައެވެ. އެގޮތުން، ދައުލަތުން ހަމަޖައްސައިދިން ވަކީލުންނާ މުއާމަލާތް ނުކުރާތީ، ފަހުން އޭނާއަށް ވަކީލުން ހަމަޖައްސައިނުދޭން އެޓާނީ ޖެނެރަލްގެ އޮފީހުން ވަނީ ނިންމާފައެވެ. މީގެ އިތުރުން ތަހުގީގު މަރުހަލާގައިވެސް އޭނާ ވަނީ ފުލުހުންނަށް އެއްބާރުލުން ދިނުމަށް ދެކޮޅުހަދާފައެވެ.
ސާހިލްގެ މައްޗަށް އުފުލާފައިވާ ފަސް ދައުވާގެ ތެރެއިން ބާކީ އޮތް ތިން ދައުވާގެ ޝަރީއަތްތައް އަދިވެސް ދަނީ ކުރިއަށެވެ. ކްރިމިނަލް ކޯޓުން ބުނި ގޮތުގައި އެ ތިން ދައުވާގެ ހުލާސާ ބަޔާން ހުށަހެޅުމުގެ އަޑުއެހުން މި މަހުގެ ފަހުކޮޅު ބޭއްވުމަށް ވަނީ ތާވަލުކޮށްފައެވެ. މި މައްސަލައިގެ އެންމެ ބޮޑު ދައުވާ ކަމަށްވާ ގަސްދުގައި މީހަކު މެރުމުގެ ދައުވާގެ ހުކުމް އިއްވުން އޮންނާނީ އެ އަޑުއެހުންތަކަށްފަހުގައެވެ.
