ރާއްޖޭގައި މުދައްރިސުންގެ ދަތިކަން ވަރަށް ބޮޑަށް ކުރިމަތިވެފައިވާ ކަމަށާއި، މިއީ ވަރަށް ބޮޑު ކާރިސާއެއް ކަމަށް ތައުލީމީ ވަޒީރު ޑރ. އިސްމާއިލް ޝަފީއު ވިދާޅުވެއްޖެއެވެ. މީސް މީޑިއާގައި ކުރެއްވި ޕޯސްޓެއްގައި ވަޒީރު ވިދާޅުވި ގޮތުގައި، 2023 ވަނަ އަހަރު ނިމުނުއިރު، ހާއްސަކޮށް އުނގެނުމުގައި ހާއްސަ އެހީތެރިކަމަށް ބޭނުންވާ ދަރިވަރުންނަށް ކިޔަވައިދިނުމަށް 600 އަށްވުރެ ގިނަ މުދައްރިސުން ބޭނުންވެފައިވެއެވެ.
މި ދަތިކަން މެދުވެރިވެފައިވަނީ، ފާއިތުވި އަހަރުތަކުގައި މުދައްރިސުންގެ ދުޅަހެޔޮކަމަށާއި ވަޒީފާގެ ރައްކާތެރިކަމަށް އެކަށީގެންވާ ސަމާލުކަމެއް ދީފައި ނުވުމުގެ އިތުރުން، އައު މުދައްރިސުން ތަމްރީނުކުރުމަށް ގައުމީ ފެންވަރުގައި އެކަށީގެންވާ މަސައްކަތްތަކެއް ކޮށްފައި ނުވާތީ ކަމަށް ވަޒީރު ފާހަގަކުރެއްވިއެވެ. މީގެ އިތުރުން މާލޭގައި ދިރިއުޅުމުގެ އަގުބޮޑުވުމާއި، ދިވެހިންގެ ދިރިއުޅުމުގެ ވައްޓަފާޅިއަށް ރިއާޔަތްކޮށް މުދައްރިސްކަން ފަސޭހައިން ކިޔެވޭނެ މަގު ތަނަވަސްކޮށްދީފައި ނުވާކަންވެސް ފާހަގަކުރެއްވިއެވެ.
މި މައްސަލައަށް ހައްލެއް ހޯދުމުގެ ގޮތުން، އެއްވެސް ތަމްރީނެއް ނެތް ފަރާތްތަކެއް ހާއްސަ އެހީއަށް ބޭނުންވާ ދަރިވަރުންނަށް ކިޔަވައިދިނުމުގެ ބަދަލުގައި، އެއް އަހަރު ދުވަހުގެ ޑިޕްލޮމާއެއް ހަދައިގެން ތިބި ފަރާތްތައް މުދައްރިސުންގެ ގޮތުގައި ގަބޫލުކުރުމަށް ވަޒީރު ހުށަހަޅުއްވައިފިއެވެ. އަދި އެފަދަ މުދައްރިސުންނަށް ޑިގްރީ ފުރިހަމަ ކުރުމަށް އިތުރު އެހީތެރިކަން ފޯރުކޮށްދިނުމަށްވެސް ވަޒީރު ގޮވާލައްވާފައިވެއެވެ.
މުދައްރިސެއްގެ އަތުގައި ފުރަތަމަ ޑިގްރީއެއް އޮތުން މުހިންމު ނަމަވެސް، ހަމައެކަނި 3 ނުވަތަ 4 އަހަރުގެ ސަނަދެއް ހޯދުމަށްފަހު ނޫނީ ސްކޫލްތަކުގައި ކިޔަވައިނުދެވޭ ގޮތަށް އޮތުމަކީ ރާއްޖޭގެ މިހާރުގެ ހާލަތު ތަންދޭ ކަމެއް ނޫންކަމަށާއި، މިއީ މުދައްރިސުން ލިބުމުގެ ދަތިކަން ދިމާވެފައިވާ އެހެން ގައުމުތަކުގައިވެސް އަމަލުކުރާ ގޮތެއް ނޫންކަމަށް ވަޒީރު ވިދާޅުވެފައިވެއެވެ.
