ހއ. އަތޮޅުގައި ހުންނަ މަނަފަރު ރިސޯޓުން ކުނި އުފުލައިގެން ކ. ތިލަފުށްޓަށް ދަތުރުކުރަމުންދިޔަ "ގުރުވަ 1″ ނަމަކަށް ކިޔާ ދޯންޏެއް ނ. ކުޑަރަށް ކައިރިން ފަރަށް އަރައިފިއެވެ.
11:24 ގައި މި ހާދިސާގެ މައުލޫމާތު އެމްއެންޑީއެފަށް ލިބުމާއެކު، އެ ދޯނީގައި ތިބި އެއް ދިވެއްސަކާއި ދެ ބިދޭސީން އެމްއެންޑީއެފުން ވަނީ ސަލާމަތްކޮށްފައެވެ. އެމްއެންޑީއެފުން މައުލޫމާތު ދީފައިވާ ގޮތުގައި ހާދިސާގައި ސަލާމަތްކުރެވުނު ތިން ފަޅުވެރިންގެ ހާލު ވަނީ ރަނގަޅު ކަމަށެވެ.
ސަލާމަތްކުރެވުނު ފަޅުވެރިން މިއަދު ހެނދުނު 8:45 ހާއިރު ވަނީ ނ. ހޮޅުދުއަށް ގެންގޮސްފައެވެ. މި ހާދިސާ ހިނގާފައިވަނީ މުޅި ރާއްޖޭގެ މޫސުން އެހާ ރަނގަޅު ނޫން ދުވަސްވަރެއްގައި ކަން ފާހަގަކުރެވެއެވެ.
