ރައީސް މުއިއްޒު ވިދާޅުވި ގޮތުގައި ސަރުކާރުގެ އެންމެ އިސް އެއް ވާޖިބަކަށް ވާންޖެހޭނީ ސިފައިންނާއި ފުލުހުންގެ މުއައްސަސާތައް ކުރިއެރުވުމަށްޓަކައި، އެ މުއައްސަސާތަކަށް ޚިދުމަތްކުރާ ޚިދުމަތްތެރިންނަށް ބޭނުންވާ ކަންކަން ކޮށްދިނުމަށް އިސްކަންދިނުމެވެ. އަދި އެއީ މި ސަރުކާރުގެ ސިޔާސަތު ކަމަށާއި، އެންމެ ފުރަތަމަ ދުވަހުން ފެށިގެން އެކަމަށް މަސައްކަތްކުރައްވަމުން ގެންދަވާ ކަމަށް ވިދާޅުވިއެވެ.
ރައީސް މުއިއްޒު އިތުރަށް ފާހަގަކުރެއްވި ގޮތުގައި ޤައުމަށް ދިމާވާ ކޮންމެ ކަމެއްގައި އެންމެ ފުރަތަމަ ސަފަށް ނުކުންނަނީ ސިފައިންނާއި ފުލުހުންކަން އެއީ ހަގީގަތެކެވެ. އަދި ކޮންމެ ދުވަހަކީ ވެސް ސިފައިންނާއި ފުލުހުން ޤައުމަށްޓަކައި ވާ މަތިވެރި ޤުރުބާނީއެއް ކަމަށް ވިދާޅުވިއެވެ.
މީގެއިތުރުން، ސިފައިންނާއި ފުލުހުންނަށް ތަމްރީނާއި އިތުރު ފުރުސަތުތައް ހޯދައިދިނުމަކީ މި ސަރުކާރުން އަބަދުވެސް ވަރަށް ބޮޑު އިސްކަމެއް ދޭނެ ކަމެއް ކަމުގައި ރައީސް މުއިއްޒު ވަނީ ފާހަގަކުރައްވާފައެވެ.
